Ընդդիմությունը վրաններ է տեղակայել Թբիլիսիի պետական համալսարանի հարևանությամբ

Վրաստանի ընդդիմության ներկայացուցիչները փակել են Թբիլիսիի գլխավոր պողոտաներից մեկը՝ Ճավճավաձեն, վրաններ տեղակայելով ինչպես փողոցում, այնպես էլ՝ Թբիլիսիի պետական համալսարանի գլխավոր մասնաշենքի հարևանությամբ։ Գիշերն անցել է հանգիստ, ցուցարարների հետ են եղել «Հանուն փոփոխությունների կոալիցիայի» առաջնորդներ Նիկա Գվարամիան և «Միասնություն-ազգային շարժում» կոալիցիայի առաջնորդներից Գիորգի Վաշաձեն։ Հավաքի ժամանակ արգելվել է ալկոհոլը։ ԹՊՀ գլխավոր մասնաշենքի մոտ ակցիան շարունակվելու է մինչև նոյեմբերի 18-ի երեկոյան 20։00-ը, որից հետո ցուցարարները տեղակայվելու են այլ վայրում։

Վրաստանում խորհրդարանական ընտրությունները կայացել են հոկտեմբերի 26-ին։ Կենտրոնական ընտրական հանձնաժողովի վերջնական տվյալների համաձայն՝ իշխող «Վրացական երազանք-Ժողովրդավարական Վրաստան» կուսակցությունը հաղթել է ձայների 53,93%-ով և ստացել օրենսդիր մարմնում 150 մանդատներից 89-ը։ Խորհրդարան մտած բոլոր ընդդիմադիր կուսակցությունները և երկրի նախագահ Սալոմե Զուրաբիշվիլին հրաժարվել են ճանաչել ընտրությունների արդյունքները՝ հայտարարելով, որ դրանք կեղծված են։ Ընդդիմության առաջնորդները բողոքի ցույցեր են անցկացնում նոյեմբերի 4-ից։