Իսրայելը նախնական հավանություն է տվել Լիբանանում «Հեզբոլլահ»-ի հետ հրադադարի մասին առաջարկվող համաձայնագրին, հաղորդում է իսրայելական Ynet պորտալը՝ հղում անելով իսրայելական, ամերիկյան և լիբանանյան աղբյուրներին։ Նրանց կարծիքով՝ վերջնական որոշումը պետք է կայացնի Իսրայելի կառավարությունը։
Իր հերթին Ամերիկյան Axios պորտալը գրում է, որ Մերձավոր Արևելքում ԱՄՆ հատուկ բանագնաց Ամոս Հոխշտեյնը սպառնացել է դուրս գալ բանակցություններից, եթե Իսրայելի իշխանությունները հրադադարի շուրջ համաձայնության չգան։
Կայքի տվյալներով՝ համաձայնագրի նախագիծը ներառում է 60-օրյա անցումային շրջան, որի ընթացքում իսրայելցի զինվորականները պետք է լքեն հարավային Լիբանանը։ Ակնկալվում է, որ լիբանանյան բանակը կտեղակայվի սահմանին մոտ գտնվող շրջաններում, մինչդեռ Հեզբոլլահը իր ծանր սպառազինությունը կտեղափոխի Լիտանի գետից հյուսիս: Այն նաև նախատեսում է ԱՄՆ-ի գլխավորած կոմիտեի ստեղծում՝ նախաձեռնության իրականացմանը վերահսկելու համար։
Իսրայելի բարձրաստիճան պաշտոնյան ասել է, որ համաձայնագրի մասին կարող է պաշտոնապես հայտարարվել այս շաբաթ:
Հիշեցնենք, որ սեպտեմբերի 23-ին Իսրայելը «Հեզբոլլահ»-ի դեմ սկսեց «Հյուսիսի նետեր» գործողությունը, որի ընթացքում զանգվածային ավիահարվածներ է հասցնում լիբանանյան տարածքում շիա կազմակերպության ռազմական օբյեկտներին։ Հոկտեմբերի 1-ի գիշերը Իսրայելի բանակը հայտարարեց հարավային Լիբանանի սահմանային շրջաններում ցամաքային գործողություն սկսելու մասին։
Հետևեք մեզ տելեգրամում
