Վրաստանի վարչապետ Իրակլի Կոբախիձեն խորհրդարանի կողմից կառավարության կազմը հաստատվելուց հետո հայտարարել է, որ «Վրացական երազանք»-ը որոշում է կայացրել մինչև 2028թ․ դադարեցնել Եվրամիության հետ կազմակերպությանն անդամակցելու շուրջ բանակցությունները, ինչպես նաև հրաժարվել ԵՄ-ի կողմից բյուջետային դրամաշնորհներից։ Նրա խոսքով, 2028 թվականի վերջն այն ժամանակն է, երբ Վրաստանը պատրաստ կլինի տնտեսական տեսակետից պատշաճ կերպով պատրաստվել 2030 թվականին Եվրամիությանն անդամակցելու բանակցությունների մեկնարկին։
Այս հայտարարությունից հետո Վրաստանի տարբեր քաղաքներում ինքնաբուխ բողոքի ակցիաներ են սկսվել։ Թբիլիսիում բողոքի ցույց է տեղի ունենում «Վրացական երազանքի» կենտրոնական գրասենյակի մոտ, ինչպես նաև Ռուսթավելի պողոտայում գտնվող խորհրդարանի դիմաց։ Այստեղ բախումներ են եղել ոստիկանության և ցուցարարների միջև։
Բաթումում բողոքի մասնակիցները հավաքվել են Եվրոպայի հրապարակում (Էրա), իսկ Քութայիսիում՝ «Վրացական երազանքի» գրասենյակի մոտ։ Քութաիսիում հանրահավաքի ժամանակ բախում է տեղի ունեցել ոստիկանների և ցուցարարների միջև, ովքեր հրաժարվել են բացել ճանապարհը։ Արդյունքում մեկ անձ բերման է ենթարկվել։
Կոբախիձեի հայտարարությունից անմիջապես հետո Վրաստանի նախագահ Սալոմե Զուրաբիշվիլին, ով աջակցում է ընդդիմությանը, բանակցությունների համար իր նստավայր է հրավիրել ԵՄ դեսպաններին։ Ավելի ուշ, նախագահական նստավայրի մոտ են հավաքվել հոկտեմբերի 26-ի ընտրություններից հետո խորհրդարան մտած, բայց իրենց մանդատներից հրաժարված բոլոր ընդդիմադիր կուսակցությունների առաջնորդները։ Վրաստանի նախագահ Սալոմե Զուրաբիշվիլին այնուհետ միացել է Ռուսթավելի փողոցում բողոքի ակցիայի մասնակիցներին։
Վրաստանի Ներքին գործերի նախարարությունը ակցիայի մասնակիցներին կոչ է արել գործել օրենքի սահմաններում, այլապես կհետևի ոստիկանության համապատասխան իրավական արձագանքը։ Թբիլիսիի Ազատության հրապարակում մոբիլիզացվել են հատուկջոկատայիններ, ինչպես նաև հատուկ տեխնիկա՝ այդ թվում՝ ջրցան մեքենաներ։
Հետևեք մեզ տելեգրամում
