ԱՄՆ նախագահ Դոնալդ Թրամփի՝ Գազայից բնակիչներին տեղահանելու և այն վերակառուցելու առաջարկից հետո եգիպտական կողմն աշխատում է ներկայացնել սեփական նոր ծրագիրը՝ առանց պաղեստինցիների տեղահանման:
Al Arabiya-ն ներկայացնում է որոշ մանրամասներ: Եգիպտոսն առաջարկել է վերակառուցել Գազան 3 փուլերով, որը կտևի գրեթե 5 տարի, իսկ պաղեստինցիները Գազայից դուրս չեն գա:
Համաձայն եգիպտական առաջարկի՝ Գազայի ներսում կստեղծվեն 3 անվտանգության գոտիներ նախնական վեցամսյա «վաղ վերականգնման ժամանակաշրջանում»: Այդ տարածքները կհամալրվեն շարժական տներով և ապաստարաններով:
Եգիպտական և միջազգային ավելի քան քսան ընկերություններ կիրականացնեն փլատակների հեռացման և մաքրման աշխատանքներ, ինչպես նաև կվերականգնեն Գազայի ենթակառուցվածքները:Առաջարկի համաձայն՝ վերակառուցումը տասնյակ հազարավոր աշխատատեղեր կստեղծի Գազայի բնակիչների համար:
Պետք է ստեղծվի նաև պաղեստինյան ադմինիստրացիա, որը ենթակա չի լինի ո՛չ ՀԱՄԱՍ-ին, ո՛չ էլ պաղեստնիյան ինքնավարությանը: Ադմինիստրացիան կղեկավարի Գազայի հատվածը և կհետևի վերակառուցման ջանքերին:
Ձևավորվելու է նաև պաղեստինյան ոստիկանական ուժ՝ բաղկացած մեծամասամբ Պաղեստինյան ինքնավարության ոստիկաններից, ովքեր կուժեղանան արևմտյան և եգիպտական վերապատրաստված ուժերի կողմից:
Եգիպտացի պաշտոնյաներն առաջարկը քննարկում են եվրոպացի, Սաուդյան Արաբիայի, Կատարի, ԱՄԷ-ի պաշտոնյաների հետ: Քննարկվում են նաև վերակառուցման ծրագրի ֆինանսավորման ուղիները՝ այդ թվում միջազգային համաժողովի անցկացումը:
Նշենք, որ համաձայն ՄԱԿ-ի հրպարակած տվյալների՝ վնասվել կամ ավերվել են Գազայի ճանապարհների ավելի քան 90%-ը, առողջապահական հաստատությունների՝ 80%-ը։
Ենթակառուցվածքներին հասցված վնասը գնահատվել է 30 միլիարդ դոլար, իսկ բնակարանային վնասը՝ 16 միլիարդ դոլար:
Հետևեք մեզ տելեգրամում
