Վրաստանի խորհրդարանն առաջին ընթերցմամբ հավանություն է տվել օրինագծին, որն իրենից ներկայացնում է օտարերկրյա գործակալների գրանցման մասին 1938 թվականի ամերիկյան օրենքի (Foreign Agents Registration Act (FARA)) մանրակրկիտ թարգմանությունը: Քվեարկությանը մասնակցել են միայն իշխող «Վրացական երազանք» կուսակցության պատգամավորները: Այս մասին հայտնում են վրացական լրատվամիջոցները։
Ըստ DW-ի՝ օրինագիծն ընդունվել է առաջին ընթերցմամբ։ Իշխող կուսակցությունից կողմ է քվեարկել 84 պատգամավոր։ Ոչ ոք դեմ չի արտահայտվել։ Ընդդիմությունը բոյկոտել է խորհրդարանի աշխատանքը՝ հոկտեմբերին կայացած ընտրությունը համարելով կեղծված։
Խորհրդարանի իրավական հարցերի հանձնաժողովի ղեկավար Արչիլ Գորդուլաձեն ասել է, որ օտարերկրյա գործակալների գրանցման մասին Վրաստանի նոր օրենքը «ամերիկյան օրենքի մանրամասն թարգմանությունն է»։ Նա հիշեցրել է, որ 2024 թվականի ամռանը Վրաստանում ուժի մեջ է մտել «Օտարերկրյա ազդեցության թափանցիկության մասին» օրենքը։ Այն հաստատվել է՝ չնայած զանգվածային բողոքի ցույցերին։
Նոր օրենքի տարբերությունն այն է, որ այն կարող է վերաբերել նաև շարքային քաղաքացիներին։ «Եթե այսօր գործող «թափանցիկության մասին օրենքը» վերաբերում է միայն ՀԿ-ներին, կազմակերպություններին, առցանց լրատվամիջոցներին և հեռարձակողներին, ապա ամերիկյան օրենքը վերաբերում է նաև ֆիզիկական անձանց, որոնք կարող են լինել և օտար ուժ, և գործակալ»,- նշել է Գորդուլաձեն։
Առաջին օրենքի ընդունումից հետո ՀԿ-ների մեծ մասը հրաժարվել է գրանցվել պետական ռեգիստրում և այժմ այդ պատճառով վճարում է տուգանքներ։ Օրենքի կիրառման վերահսկողությունն իրականցնելու է Վրաստանի հակակոռուպցիոն բյուրոն:
Հետևեք մեզ տելեգրամում
