Եվրոպան պետք է արձագանքի ԱՄՆ նախագահ Դոնալդ Թրամփի՝ եվրոպական անվտանգության ապահովման գործում Վաշինգտոնի դերը նվազեցնելու ցանկություններին՝ մայրցամաքում ստեղծելով ուժի նոր կենտրոն: Նման կարծիք է հայտնել Թուրքիայի արտաքին գործերի նախարար Հաքան Ֆիդանը բրիտանական Financial Times թերթին տված հարցազրույցում։
«Թրամփի գործողությունները տագնապային զանգ են բոլորիս համար, ինչը նշանակում է, որ մենք պետք է համախմբվենք և ստեղծենք մեր ուժի կենտրոնը։ Թուրքիան պատրաստ կլինի դառնալ եվրոպական անվտանգության նոր ճարտարապետության մաս ՆԱՏՕ-ի փլուզման դեպքում»,-ասել է Ֆիդանը։
«Ջինը շշից դուրս է եկել, և այն ետ դնելու միջոց չկա: Եթե նույնիսկ նախագահ Թրամփը որոշի առայժմ չլքել Եվրոպան, հնարավոր է, որ ապագայում նմանատիպ հայացքներ և քաղաքական գաղափարներ ունեցող մեկը դիտարկի Եվրոպայի անվտանգության ապահովման գործում ԱՄՆ մասնակցությունը սահմանափակելու հնարավորությունը»,-նշել է Թուրքիայի ԱԳՆ ղեկավարը։
Հետևեք մեզ տելեգրամում
