Իսրայելը պետք է վերանայի Ադրբեջանի հետ հարաբերությունները: Նման տեսակետ է ներկայացվել The Jerusalem Post-ում հրապարակված հոդվածում:
Հոդվածի սկզբում հիշեցվել է, որ Նեթանյահուի կառավարությունն ու աջակիցները լոբբինգ են իրականացրել Թրամփի վարչակազմում՝ Աբրահամյան համաձայնագրերում Ադրբեջանին ներառելու համար՝ ԱՄՆ-ի և Ադրբեջանի հետ «եռակողմ համագործակցության ամուր հիմք» ստեղծելու հույսով:
Սակայն նշվել է, որ այս մոտեցումը միանշանակ չէ:
Նախ Ադրբեջանն արևմտամետ երկիր չէ, իսկ նրա ղեկավարը դիկտատոր Իլհամ Ալիևն է, ով չի հարգում մարդու իրավունքները և օգտագործել է իր երկրի նավթն ու գազը գործարքային դիվանագիտության և աշխարհաքաղաքական առևտրի համար:
Ադրբեջանում կառավարական ճնշումները քաղաքական ընդդիմախոսների և քննադատների նկատմամբ համատարած են, իսկ մամուլի ազատությունը բացակայում է:
«Չափազանց ակնհայտ էր Ադրբեջանի ագրեսիան Հայաստանի նկատմամբ: Բաքուն պետք է պատասխան տա հայ ժողովրդի դեմ իրականացված պատերազմական հանցագործությունների համար, այդ թվում՝ 2023 թվականի սեպտեմբերին իրենց պապենական հայրենիքից՝ Լեռնային Ղարաբաղից ավելի քան 120,000 հայերի էթնիկ զտումների համար, որը հայերի ամենամեծ տեղահանումն էր 1915 թվականի Հայոց ցեղասպանությունից ի վեր»,- նշվել է հոդվածում:
Բացի այդ Ադրբեջանը պետք է ազատ արձակի ապօրինի պահվող հայ քաղբանտարկյալներին, այդ թվում՝ մարդասեր Ռուբեն Վարդանյանին:
Հիշեցվել է, որ իրավապաշտպան կազմակերպությունները, այդ թվում՝ Genocide Watch-ը և այլ գործիչներ, ինչպիսին է Լուիս Մորենո Օկամպոն, Ադրբեջանի գործողություններն անվանել են ցեղասպանություն: Հետևաբար նման պայմաններում, հանուն ռեալպոլիտիկի, Իսրայելը չպետք է համագործակցի այսպիսի երկրի հետ մարդու իրավունքների հաշվին:
Հետևեք մեզ տելեգրամում
