Ուկրաինայի արտաքին գործերի նախարարությունը հայտարարություն է տարածել՝ անհիմն որակելով Իրաքի տարածքում ուկրաինական կողմի ենթադրյալ ապօրինի գործունեության վերաբերյալ Իրաքի ազգային անվտանգության հարցերով խորհրդական Քասիմ ալ-Աբուդիի պնդումները։
Ուկրաինական դիվանագիտական գերատեսչության փոխանցմամբ՝ ալ-Աբուդին իր հայտարարությունները հաստատող որևէ ապացույց չի ներկայացրել, իսկ իրաքյան կողմը դիվանագիտական խողովակներով Կիևին որևէ պաշտոնական տվյալ չի փոխանցել։ Նախարարությունում ընդգծել են, որ այդ մեղադրանքների մասին իմացել են միայն «Dijlah TV»-ի ուղիղ եթերից։
Ուկրաինայի ԱԳՆ-ն հայտարարել է, որ բարեկամ երկրի բարձրաստիճան պաշտոնյայի կողմից առանց բավարար ապացույցների նման հայտարարությունների հրապարակային տարածումն անընդունելի է և կարող է վնասել երկու երկրների միջև փոխադարձ վստահությանն ու հարաբերություններին։
Ավելի վաղ ալ-Աբուդին հայտնել էր, որ Իրաքի իրավապահները ձերբակալել են երկրի ներսում քաղաքացիական թիրախների դեմ հարձակումների մեջ ներգրավված մի քանի խմբերի։ Նրա խոսքով՝ ձերբակալվածները հարցաքննության ընթացքում հայտնել են, որ աշխատել են Ուկրաինայի համար։ Պաշտոնյան, սակայն, չի ներկայացրել այդ պնդումները հաստատող ապացույցներ և նշել է, որ պաշտոնական մեղադրանքներ առաջադրելու համար անհրաժեշտ է լայնածավալ հետաքննություն։
Հետևեք մեզ տելեգրամում
