Թյուրքական պետությունների կազմակերպության (ԹՊԿ) անդամ երկրները քննարկում են իրենց քաղաքացիների համար սահմանային անցման միասնական համակարգ ստեղծելու հնարավորությունը, որը նման կլինի Եվրամիությունում գործող Շենգենյան համակարգին։ Այս մասին Աստանայում անցկացվող ԹՊԿ անդամ երկրների ներքին գործերի նախարարների երրորդ հանդիպման ժամանակ հայտարարել է Թուրքիայի ներքին գործերի նախարար Մուստաֆա Չիֆթչին։
«Նման պրակտիկա գործում է Եվրամիությունում․ մենք տեսնում ենք, որ ԵՄ քաղաքացիներն անցնում են անձնագրային վերահսկողության մի կետով, իսկ մյուս երկրների քաղաքացիները՝ մեկ այլ։ Թյուրքական պետությունների միջև նմանատիպ համակարգ ստեղծելու ուղղությամբ մեր աշխատանքները շարունակվում են»,- ասել է Չիֆթչին։
Նրա խոսքով՝ ԹՊԿ անդամ երկրների օդանավակայաններում արդեն աշխատանքներ են տարվում կազմակերպության անդամ պետությունների քաղաքացիների համար անձնագրային վերահսկողության առանձին անցակետեր ստեղծելու ուղղությամբ։
Թյուրքական պետությունների կազմակերպության անդամներն են Ադրբեջանը, Ղազախստանը, Ղրղզստանը, Թուրքիան և Ուզբեկստանը։
Հետևեք մեզ տելեգրամում
