ԱՄՆ նոր վարչակազմն առաջին անգամ անդրադարձել է Վրաստանում ստեղծված իրավիճակին։
globalnews.ge լրագրողն ԱՄՆ պետքարտուղարության խոսնակ Թեմի Բրյուսից հետաքրքրվել է, թե արդյոք «որևէ կոնտակտ եղել է Վրաստանի իշխող կուսակցության հետ, եթե այո, ապա ինչպիսին են հարաբերությունները հիմա»։ Լրագրողը ներկայացրել է նաև Վրաստանում իրավիճակն ու հետաքրքրվել, թե ինչպիսին է ԱՄՆ դիրքորոշումը Վրաստանում տիրող ներկայիս իրավիճակին։
«Միացյալ Նահանգները հստակ ուրվագծել է այն քայլերը, որոնք Վրաստանի կառավարությունը կարող է ձեռնարկել՝ ցույց տալու համար, որ լրջորեն է վերաբերվում Միացյալ Նահանգների հետ հարաբերությունների բարելավմանը: Ինչ վերաբերում է «Վրացական երազանքի» կառավարության շարունակվող հակաժողովրդավարական գործողություններին, ինչպես Մյունխենում նշել է փոխնախագահ Վանսը, ժողովրդավարական մանդատ չի կարող ձեռք բերվել հակառակորդներին գրաքննելով կամ բանտարկելով, ոչ էլ հիմնական ընտրազանգվածի տեսակետներն անտեսելով, թե ով պետք է լինի մեր ընդհանուր հանրության մաս: ԱՄՆ-ն 33 տարի է Վրաստանի և վրաց ժողովրդի գործընկերն է և այս ընթացքում վճռականորեն աջակցել է Վրաստանի անկախությանը, ինքնիշխանությանը և տարածքային ամբողջականությանը»,-ասված է հայտարարության մեջ:
Վրաստանում ԱՄՆ դեսպանատունը հաստատում է ԱՄՆ Պետդեպարտամենտի՝ գործակալության կողմից հրապարակված մեկնաբանության իսկությունը։ Այս մասին վրացական Interpressnews.ge լրատվական գործակալությանը հայտնել են դեսպանատան մամուլի ծառայությունից։
Հետևեք մեզ տելեգրամում
