ԱՄՆ պետքարտուղարությունը ամերիկյան դեսպանատներին և հյուպատոսություններին հանձնարարականներ է տվել տեղեկատվություն տարածել այն մասին, որ Վաշինգտոնը չի մասնակցում Իրանի դեմ «Իսրայելի միակողմանի գործողություններին»: Այս մասին հաղորդել է CBS News հեռուստաալիքը՝ հղում անելով աղբյուրներին:
Հրահանգի համաձայն՝ դեսպանատներն ու հյուպատոսությունները պետք է «իրենց հայեցողությամբ ընդունող կառավարություններին հաղորդեն կամ վերահաստատեն, որ Միացյալ Նահանգները չի մասնակցել Իրանում թիրախների դեմ Իսրայելի միակողմանի գործողություններին, և ոչ էլ աջակցություն է ցուցաբերել, բայց միևնույն ժամանակ, անհրաժեշտ է ընդգծել, որ Միացյալ Նահանգները հավատարիմ է մնում Իրանի միջուկային հարցի դիվանագիտական լուծմանը»։
Դեսպանությունները պետք է միջազգային գործընկերներին տեղեկացնեն, որ ԱՄՆ կառավարությունը «բոլոր ամերիկացի քաղաքացիների անվտանգությունն ու պաշտպանվածությունը» դնում է առաջին տեղում։ Նրանք պետք է նաև ընդգծեն, որ ոչ ոք չի կարող «հարձակվել ամերիկացի քաղաքացիների, բազաների կամ ենթակառուցվածքների վրա», և որ «Իրանը չպետք է միջուկային զենք ունենա»։
«ԱՄՆ զինված ուժերը շարունակում են պաշտպանական դիրք գրավել՝ տարածաշրջանում ամերիկյան անձնակազմը, ուժերը և ենթակառուցվածքները պաշտպանելու և կորուստները նվազագույնի հասցնելու համար, հատկապես հաշվի առնելով իրանական բալիստիկ հրթիռների շարունակական սպառնալիքը»,-հրամանից մի հատված է մեջբերում հեռուստաալիքը։
Հետևեք մեզ տելեգրամում
