Վրաստանը վեց ամսվա ընթացքում զբոսաշրջությունից ստացված եկամտի նոր ռեկորդ է սահմանել

Վրաստանի զբոսաշրջությունից ստացված եկամուտները 2025 թվականի առաջին կիսամյակում աճել են 3.8%-ով՝ հասնելով ռեկորդային 2 միլիարդ դոլարի, ասվում է Ազգային զբոսաշրջության վարչության հայտարարության մեջ։

Վարչության տվյալներով՝ 2025 թվականի առաջին երկու եռամսյակներում զբոսաշրջությունից ստացված եկամուտները 35.4%-ով գերազանցել են 2019 թվականի նույն ժամանակահատվածի մակարդակը (COVID-19 համավարակից առաջ)։

Հունվար-հունիս ամիսներին զբոսաշրջությունից ստացված եկամուտների զգալի աճ է գրանցվել Իսրայելից (37.9%), Եվրոպական Միությունից և Միացյալ Թագավորությունից (12.5%), Ադրբեջանից (30.7%), Սաուդյան Արաբիայից (18.9%) և Հայաստանից (2.8%)։

Բացի այդ, 2025 թվականի առաջին կեսին Վրաստան է այցելել 3.2 միլիոն միջազգային ճանապարհորդ, ինչը 4.4%-ով ավելի է, քան 2024 թվականի նույն ժամանակահատվածում։ Այս ժամանակահատվածում զբոսաշրջիկների այցելություններն աճել են 6.9%-ով և կազմել 2.3 միլիոն։

2025 թվականի հունվար-հունիս ամիսներին Վրաստան այցելությունների ամենամեծ թիվը կատարել են Ռուսաստանի քաղաքացիները՝ գրեթե 581.1 հազար, ինչը 10.2%-ով ավելի է, քան 2024 թվականի նույն ժամանակահատվածում։