Վրաստանն աջակցում է Հարավային Կովկասում խաղաղ համակեցությանը և պատրաստ է նպաստել տարածաշրջանում խաղաղությանն ու կառուցողական համագործակցությանը: Այս մասին Թուրքիայի նախագահ Ռեջեփ Թայիփ Էրդողանի հետ ճեպազրույցում հայտարարել է Վրաստանի նախագահ Միխեիլ Ղավելաշվիլին:
«Մենք ողջունում ենք Ադրբեջանի և Հայաստանի կողմից ձեռնարկված քայլերը՝ ուղղված կայուն խաղաղության հաստատմանը, որը պետք է նպաստի տարածաշրջանում խաղաղության և կայունության հասնելու շարժմանը»,-ասել է Վրաստանի նախագահ Միխեիլ Ղավելաշվիլին Թուրքիայի նախագահ Ռեջեփ Թայիփ Էրդողանի հետ ճեպազրույցի ժամանակ։
Վրաստանի նախագահը հայտարարել է, որ Վրաստանն աջակցում է Հարավային Կովկասում խաղաղ համակեցության բանաձևին և միշտ արտահայտում է իր պատրաստակամությունը նպաստելու տարածաշրջանում խաղաղության և կառուցողական համագործակցության խթանման գործընթացին։
«Հաշվի առնելով առկա աշխարհաքաղաքական իրականությունը, տարածաշրջանային համագործակցությունը ձեռք է բերել ավելի մեծ նշանակություն և ուղղված է խաղաղության և կայունության խթանմանը, ինչպես նաև մեր երկրների զարգացմանը: Այս առումով, Ադրբեջան-Վրաստան-Թուրքիա եռակողմ ձևաչափը շատ լավ օրինակ է, թե ինչպես կարող են արդյունավետ և հաջողությամբ համագործակցել այն երկրները, որոնք հարգում են միմյանց ինքնիշխանությունն ու տարածքային ամբողջականությունը և պատրաստ են իրականացնել տարածաշրջանի համար մեծ նշանակություն ունեցող նախագծեր»,-ասել է Միխեիլ Ղավելաշվիլին։
Հետևեք մեզ տելեգրամում
