Թուրքիայի նախագահ Ռեջեփ Թայիփ Էրդողանը Վրաստանի նախագահ Միխեիլ Կղավելաշվիլիի հետ հանդիպումից հետո հայտարարել է, թե Վրաստանի և Թուրքիայի միջև ռազմավարական համագործակցությունն էլ ավելի կամրապնդվի։
«Մենք երկու երկրներ ենք, որոնք մասնակցում են Բաքու-Թբիլիսի-Կարս երկաթուղային նախագծին, որը Միջին միջանցքի ողնաշարն է, և մենք ունենք ռազմավարական նշանակություն ունեցող նավթատարներ և գազատարներ։ Վրաստանը մեսխեթցի թուրքերի հայրենիքն է, որոնք 1944թ․ նոյեմբերին բռնի տեղահանվել են իրենց պատմական հայրենիքից։ Ես նաև նախագահ Կղավելաշվիլիին փոխանցեցի մեր սպասումները մեսխեթցի թուրքերի՝ իրենց պատմական օջախներ արժանապատիվ և անվտանգ վերադարձի վերաբերյալ, և մենք՝ որպես թուրքեր, արժանի աջակցություն կցուցաբերենք այս գործընթացին»,- հայտարարել է Էրդողանը։
Թուրքիայի նախագահն անդրադարձել է նաև երկու երկրի առևտրաշրջանառությանը՝ նշելով, որ նախատեսում են դրա ծավալները 3 մլրդ ԱՄՆ դոլարից դարձնել 5 մլրդ ԱՄՆ դոլար։
«Շնորհիվ Վրաստանում ստեղծված լավ, ջերմ մթնոլորտի՝ Վրաստանում աշխատում են հազարավոր թուրքական ընկերություններ, թուրքական շինարարական ընկերությունները մեծ հետաքրքրություն են ցուցաբերում վրացական ներդրումային և ենթակառուցվածքային նախագծերի նկատմամբ, բացի այդ, արդեն իրականացվել են խոշոր շինարարական նախագծեր»,- նշել է Էրդողանը։
Կարևորվել է նաև ռազմական և պաշտպանական ոլորտներում հարաբերություններն ու համագործակցությունը։
Հետևեք մեզ տելեգրամում
