Թուրքիայի տրանսպորտի նախարարը տուգանվել է մեքենայի արագությունը գերազանցելու համար

Թուրքիայի տրանսպորտի և ենթակառուցվածքների նախարար Աբդուլքադիր Ուրալօղլուն տուգանվել է Անկարա-Նիղդե մայրուղում արագությունը գերազանցելու համար։

Այդ մասին նա հայտնել է X միկրոբլոգում:

Ուրալօղլուն տեսանյութ է հրապարակել, որտեղ նա մեքենա է վարում Անկարա-Նիղդե մայրուղով։ Տեսանյութում նկատվել է, որ նախարարի մեքենայի արագությունը հասել է 225 կմ/ժ-ի, գերազանցելով թույլատրելի արագության սահմանը։

Ճանապարհային ոստիկանությունը հետագայում 9267 լիրա (280 դոլար) տուգանք է նշանակել: Սոցցանցերում բուռն քննարկումներ են սկսել՝ ստիպելով նախարարին ներողություն խնդրել։ Ուրալօղլուն ի պատասխան X-ում հրապարակել է տուգանքի լուսանկարը՝ գրելով. «Ներողություն եմ խնդրում իմ ժողովրդից»։

Թուրքիայի մայրուղիներում առավելագույն թույլատրելի արագությունը 140 կմ/ժ է։