Հվ. Կովկասում խնդիրների լուծման համար կարևոր պայման է «տարածաշրջանին տեր լինել»․ Թուրքիայում ՌԴ դեսպան

2017 թ․-ից Թուրքիայում ՌԴ դեսպան Ալեքսեյ Երխովն ավարտում է աշխատանքները։ Նոր նշանակման վայր՝ Ուզբեկստան մեկնելուց առաջ թուրքական Hürriyet-ի հետ զրույցում նա նաև Մոսկվայի տեսնակյունից գնահատել է «Զանգեզուրի միջանցքի» հարցը։

«Լուրջ և հետաքրքրություն արթնացնող որոշ հարցերի պատասխանները տալու է պատմությունը։ Հարավային Կովկասում բավականին բարդ և հակասական գործընթացներ են տեղի ունենում, որոնցում և՛ Ռուսաստանը, և՛ Թուրքիան կարևոր և դինամիկ դեր են շարունակում խաղալ։ Մոսկվան և Անկարան հավասարապես հետաքրքրված են այս տարածաշրջանում կայունության ու բարօրության դաշտ ձևավորելու հարցում և աջակցում են բոլոր ջանքերին, որոնք ներդրում են ապահովում այստեղ անվտանգության հաստատմանը և փոխշահավետ համագործակցության ձևավորմանը։ Դրա հիմքը պետք է լինի Ադրբեջանի և Հայաստանի միջև խաղաղության պայմանագրի հիման վրա Հայաստան-Ադրբեջան կարգավորումը (հիշեցնեմ, որ այս գործընթացն սկսվել է Ռուսաստանի աջակցությամբ և կենտրոնական դերով 2020թ․-ի նոյեմբերի 9-ի եռակողմ հրադադարի հայտարարության ընդունմամբ)։ Պայմանագիրը դեռևս չի ստորագրվել և առայժմ միայն նախաստորագրվել է»,-ասել է դեսպանը։

Նրա խոսքով, Հարավային Կովկասում խնդիրների լուծման համար կարևոր պայման է «տարածաշրջանին տեր լինել» (regional ownership) կոչվածը․ այսինքն որոշում կայացնելու և դրանք կիրառելու գործընթացների իրականացումը լինի նախ և առաջ տարածաշրջանի երկրների կողմից՝ մոտ հարևաններ Ռուսաստանի, Թուրքիայի և Իրանի աջակցությամբ։ Արտատարածաշրջանային դերակատարների մասնակցությունը չպետք է առաջացնի նոր բաժանարար գծեր։ Դա միաժամանակ ներառում է նաև այնպիսի կարևոր հարց, ինչպիսին է տրանսպորտային ուղիների ապաշրջափակումը։

Երխովն անդրադարձել է նաև Սյունիքով անցնող «Դոնալդ Թրամփի ճանապարհին»՝ նշելով, որ այս պահին քննարկվող սցենարների և նախագծերի մասին դեռևս շատ մանրամասներ չգիտեն։

«Սյունիքի շրջանով անցնող այսպես կոչված «Դոնալդ Թրամփի ճանապարհը» ներառյալ՝ այս հարցում շատ խոսակցություն և անգամ ասեկոսեներ կան։ Այս կետում պետք է հայտնեմ, որ այս պահին քննարկվող սցենարների և նախագծերի մասին դեռևս շատ մանրամասներ չգիտենք։ Ո՞վ, ի՞նչ, ինչպե՞ս և ե՞րբ հարցերի նման այստեղ անորոշ շատ բան կա, չափազանց շատ հարցական նշան կա։ Կարևոր է նաև հասկանալ, թե ԵԱՏՄ-ի ընդհանուր մաքսային գոտուն Հայաստանի անդամակցությունն այդ երկրի տարածքով տարանցիկ բեռնափոխադրումների տեսանկյունից ինչպես կարող է ազդել այս ամենի վրա»,-հավելել է Երխովը։