Ադրբեջանը և ՆԱՏՕ-ի երկրները զինամթերք են մատակարարում Ուկրաինային մարդասիրական օգնության քողի տակ։ Այդ մասին հայտնում է թուրքական «Haber Sol» թերթը՝ վկայակոչելով Ռուանդայում գործող «Umuseke» լրատվական պորտալին։
Մասնավորապես նշվում է, որ բեռնափոխադրումը կազմակերպվել է «CIHAZ» արդյունաբերական ասոցիացիայի կողմից, որը Ադրբեջանի պաշտպանության նախարարության դուստր ձեռնարկությունն է։
Մատակարարված զինամթերքի մեջ ներառված են եղել ավիառումբեր, շարժական հակաօդային պաշտպանության համակարգեր, անօդաչու թռչող սարքերի մասեր, «Tisas» ապրանքանիշի ատրճանակներ և այլ սարքավորումներ, որոնք հիմնականում արտադրվել են թուրքական լիցենզիայով։
Նշվում է, որ Ադրբեջանից մատակարարվող զինամթերքը նախ հասնում է Թուրքիա, ապա «մարդասիրական օգնություն» անվան տակ Սուդանի նավահանգիստ է ուղարկվում «Yıldız Line« և «AGL Forwarding» ընկերությունների պատկանող նավերով։ Վերջիններս համապատասխանաբար պատկանում են Թուրքիային և Գերմանիային։ Ըստ աղբյուրների՝ զենքը այնուհետև տեղափոխվում է Գերմանիա, իսկ այնտեղից ցամաքային ճանապարհով տեղափոխվում է Ուկրաինա:
Թուրքական ընդդիմադիր թերթի գնահատմամբ՝ այս ամենը կարող է միտված լինել Ռուսաստանի ապակայունացմանը։
Հետևեք մեզ տելեգրամում
