Թրամփը Էրդողանին կոչ է արել դադարեցնել Ռուսաստանից նավթ և գազ գնելը

Սեպտեմբերի 25-ին ԱՄՆ նախագահ Դոնալդ Թրամփը Վաշինգտոնի Սպիտակ տանը հյուրընկալել է իր թուրք գործընկեր Ռեջեփ Թայիփ Էրդողանին և կոչ արել նրան հրաժարվել ռուսական էներգամատակարարումներից։

Սպիտակ տան ղեկավարը հայտարարեց, որ Միացյալ Նահանգները կարող է վերացնել Թուրքիայի պաշտպանական արդյունաբերության նկատմամբ պատժամիջոցները և թույլ տալ նրան գնել ամերիկյան հինգերորդ սերնդի F-35 կործանիչներ։

«Նա ուզում է F-35, և մենք դրա մասին շատ լուրջ ենք խոսում»,-ասել է Թրամփը՝ կոստյումի վրա ոսկեգույն կործանիչի կրծքանշանը կրելով։

Թուրքական պաշտպանական արդյունաբերության դեմ պատժամիջոցները սահմանվել են Թրամփի առաջին պաշտոնավարման ընթացքում՝ Անկարայի կողմից Մոսկվայից ռուսական S-400 հակաօդային պաշտպանության համակարգեր գնելու համար։ Հարցին, թե երբ կարող են դրանք չեղարկվել, Թրամփը պատասխանել է. «Եթե լավ հանդիպում ունենանք, գրեթե անմիջապես»։

Ռեջեփ Թայիփ Էրդողանը որևէ կոնկրետ հայտարարություն չի արել Թուրքիայի և Ռուսաստանի միջև առևտրային հարաբերությունների վերաբերյալ, սակայն հույս է հայտնել, որ ԱՄՆ նախագահի հետ կկարողանա քննարկել F-35 և F-16 ռազմական ինքնաթիռների գնման հարցը։