«Երբ խոսում ենք Հայաստանի ու Ադրբեջանի մասին պետք է հասկանանք, որ խաղաղությունը հաստատված է, պայմանագիրը նախաստորագրված։ Բայց մնում են հարցեր, որոնք ենթական են կարգավորման»։ Այդ մասին «Կառուցելով խաղաղություն և բազմակողմանի համագործակցություն» համաժողովի ընթացքում նշել է ՀՀ արտգործնախարար Արարատ Միրզոյանը։
Նա նշել է, որ Ադրբեջանի ու Հայաստանի հասարակությունների միջև կապերը դեռևս մնում են չլուծված։ Ըստ Միրզոյանի՝ երկու երկրների հասարակություններն ունեն վերքեր, տրավմաներ և դրա համար ժամանակ է պահանջվում։
«Հայաստանն ու Ադրբեջանն առաջին երկրները չեն, որ անցնում են այդ ճանապարհով։ Մենք խրախուսելու ենք երկու երկրների քաղաքացիների միջև կապերը»,- նշել է Միրզոյանը։
Անդրադառնալով հայ-թուրքական հարաբերությունների կարգավորման գործընթացին՝ Միզոյանը նշել է, որ Անկարայի հետ հարաբերությունները հայելային հակապատկերն է Ադրբեջանի հետ եղած հարաբերությունների։
«Թուրքիայի պարագայում տասնամյակներով փակ սահմաների պարագայում մարդիկ այցելել են, առևտուր են արել։ Խնդիրն այն է եղել, որ երրորդ երկրների միջոցով է եղել։ Ինտեսիվ ու բովանդակային քաղաքականություն ունենք Թուրքիայի հետ»,- ընդգծել է Միրզոյանը։
Խոսելով երկկողմ չվերթների վերաբերյալ ՝ Միրզոյանը նշել է, որ Հայաստանի և Թուրքիայի միջև թռիչքներ եղել են, պայմանավորվածություն կա ավելացնելու դրանք՝ դեպի Երևան, Գյումրի, և ըստ այդմ, Ստամբուլ, միգուցե Անկարա, հայտնել է Միրզոյանը։
Հետևեք մեզ տելեգրամում
