Հայաստան-Ադրբեջան խաղաղության գործընթացը՝ Թուրքիայի ԱԱԽ նիստի օրակարգում

Նոյեմբերի 26-ին տեղի է ունեցել Թուրքիայի Ազգային անվտանգության խորհրդի նիստը՝ նախագահությամբ երկրի ղեկավար Ռեջեթ Թայիփ Էրդողանի։ Նախագահի աշխատակազմին կից հանրային կապերի վարչությունը հաղորդագրություն է տարածել՝ ներկայացնելով նիստի ընթացքում քննարկված թեմաները։

Նիստի օրակարգում են եղել այնպիսի հարցեր, ինչպիսիք են ահաբեկչության դեմ (PKK/KCK–PYD/YPG, ՖԵԹՕ, ԻՊ) պայքարում տարվող գործողությունները, «Թուրքիան առանց ահաբեկչության» տեսլականը, Սիրիայի թեման, Գազայում տիրող իրավիճակը և Թուրքիայի պատրաստակամությունը մասնակցելու խաղաղության և կայունության ապահովմանը, Սուդանում տեղի ունեցող զարգացումները, ինչպես նաև ՌԴ-Ուկրաինա պատերազմը։

Ի թիվս այս հարցերի նիստի ընթացքում քննարկվել է Հայաստանի և Ադրբեջանի միջև խաղաղության գործընթացը։

«Ադրբեջանի և Հայաստանի միջև ընթացող խաղաղության գործընթացում վերջին շրջանում արձանագրված դրական զարգացումների համատեքստում քննարկվել են երկկողմ և տարածաշրջանային համագործակցության հնարավորությունները։ Վերահաստատվել է մեր կամքը՝ ապահովելու Հարավային Կովկասում խաղաղություն, կայունություն և զարգացում»,-նշվել է հաղորդագրության մեջ։