Իրանի նախագահ Մասուդ Փեզեշքիանն Աշխաբադում անցկացվող «Խաղաղության և վստահության միջազգային տարի 2025» համաժողովի ընթացքում հանդիպել և քննարկում է ունեցել Ռուսաստանի նախագահ Վլադիմիր Պուտինի հետ։
Մասուդ Փեզեշքիանը զրույցի ընթացքում ընդգծել է ռազմավարական համագործակցության համապարփակ փաստաթղթի իրագործման հարցում ԻԻՀ կամքը:
«Հետամուտ ենք համատեղ նախագծերի իրագործմանը, հատկապես՝ ատոմակայանների կառուցման, բեռնափոխադրումների, միջանցքների ոլորտներում: Միջանցքների ոլորտում Իրանը մինչև տարեվերջ կապահովի այս նախագծի իրականացման համար բոլոր պայմանները։ Ակնկալում ենք, որ ռուսական կողմը նույնպես կարագացնի և կավարտի այս համաձայնագրերի իրականացման գործընթացը»,-ասել է Իրանի նախագահը՝ միաժամանակ կարևորելով Հյուսիս-Հարավ, Արևելք-Արևմուտք միջանցքների զարգացումը։
«Այս ուղիներին հետամուտ ենք արագ տեմպերով, և Ձեր հրամանը, անշուշտ, կարագացնի այս կարևոր և ռազմավարական նախագծերի իրականացումը»։
Փեզեշքիանը շեշտել է, որ միաբևեռությանը դիմակայելու համար Իրանն ու ՌԴ-ն միջազգային ու տարածաշրջանային հարթակներում համագործակցությունից բացի այլ ելք չունեն:
ՌԴ նախագահ Պուտինն իր հերթին նշել է, որ տարբեր ոլորտներում Իրանի հետ համագործակցությունը շարունակվելու է: Նա ընդգծել է, որ ՌԴ-ն ՄԱԿ-ում միշտ աջակցել է Իրանին և այդ մոտեցումը ևս շարունակվելու է:
Հետևեք մեզ տելեգրամում
