Հայաստանի Ազգային ժողովի նախագահի տեղակալ Ռուբեն Ռուբինյանն արձագանքել է Իրանի Իսլամական հեղափոխության գերագույն առաջնորդի միջազգային հարցերով խորհրդական Ալի Աքբար Վելայաթիի հայտարարությանն այն մասին, որ Իրանը դեմ է «Թրամփի ուղի» նախագծի իրականացմանը, և որ այդ նախագիծը ոչնչով չի տարբերվում այսպես կոչված «Զանգեզուրի միջանցք»-ից։
«Արմենպրես»-ի փոխանցմամբ՝ Ազգային ժողովում լրագրողների հետ զրույցում Ռուբինյանը շեշտել է, որ TRIPP-ը բիզնես նախագիծ է, որը գործելու է ՀՀ ինքնիշխանության, տարածքային ամբողջականության, իրավազորության ներքո։
Ռուբինյանը հիշեցրել է, որ Իրանում Հայաստանի դեսպան Գրիգոր Հակոբյանը դեկտեմբերի 14-ին հանդիպել է Իսլամական հեղափոխության գերագույն առաջնորդի միջազգային հարցերով խորհրդական Ալի Աքբար Վելայաթիի հետ։
«Մեր դեսպանն իրանական կողմի համար կրկնել է, որ TRIPP-ը բիզնես նախագիծ է, որը գործելու է Հայաստանի ամբողջական ինքնիշխանության, տարածքային ամբողջականության, իրավազորության ներքո և հավասարության, փոխադարձության սկզբունքներով, և, ոչ, TRIPP-ը նույն «Զանգեզուրի միջանցքը» չէ։ Ինչ վերաբերում է Իրանի դիրքորոշումներին, մենք մշտապես կապի մեջ ենք մեր իրանցի գործընկերների հետ, տեղեկացնում ենք նրանց զարգացումների վերաբերյալ, հաշվի ենք առնում նրանց զգայունությունները, նրանց շահերը հաշվի առնված են»,-ասաց Ռուբինյանը։
Նա ընդգծեց՝ Իրանի ԱԳՆ-ն, այդ թվում՝ ԱԳ նախարարը, բազմիցս նշել է, որ այս նախագիծն իրենց կարմիր գծերը հաշվի առնում է, նաև հնարավորություններ է ստեղծում իրենց համար։ Ռուբինյանը կարծում է, որ սա ուժի մեջ է։
ԱԺ փոխնախագահը նկատեց՝ ցանկացած երկրի պաշտոնական դիրքորոշում հայտնում է տվյալ երկրի ԱԳ նախարարությունը։ Հայաստանը հիմնվում է Իրանի ԱԳ նախարարության հայտարարությունների վրա։
«Բացառվում է Հայաստանում լինի որևէ նախագիծ, որը կհակասի Հայաստանի ինքնիշխանությանը, տարածքային ամբողջականությանը և չի լինի Հայաստանի լիակատար իրավազորության ներքո։ Մենք հաշվի առնում ենք մեր հարևանների բոլոր կենսական շահերը, և Իրանի դեպքում ընդհանրապես այդ շահերը Հայաստանի հետ մեծամասամբ համընկնում են։ Մենք չենք կարծում, որ կա որևէ անհանգստանալու բան, և այս առումով կապի մեջ ենք մեր բոլոր գործընկերների հետ։ Եվ մեզ ուրախացնում է այն փաստը, որ Իրանի ԱԳՆ-ն բազմիցս նշել է, որ այս հարցում իրապես միջանցքի խնդիր չկա, և Իրանի կարմիր գծերը նույնպես հաշվի առնված են։ Դա առաջին հերթին Հայաստանի կարմիր գիծն է, որ Հայաստանի տարածքով արտատարածքային միջանցք չի լինելու»,-ասաց Ռուբինյանը։
Հայաստանն ու Ադրբեջանն օգոստոսի 8-ին ԱՄՆ նախագահ Դոնալդ Թրամփի վկայությամբ Վաշինգտոնում հռչակագիր են ստորագրել, որի կետերից մեկի համաձայն՝ Հարավային Կովկասում հաղորդակցությունների ապաշրջափակման կոնտեքստում Հայաստանն ու ԱՄՆ-ն միասին կաշխատեն Հայաստանի տարածքում «Թրամփի ուղի՝ հանուն միջազգային խաղաղության և բարգավաճման» նախագծի իրականացման վրա։ Այդ ճանապարհը նաև պետք է ապահովի կապն Ադրբեջանի հիմնական մասի և Նախիջևանի միջև։ Ավելի ուշ ՀՀ վարչապետ Նիկոլ Փաշինյանը հայտարարել էր, որ «Թրամփի ուղի»-ն Հայաստանի ներկայացրած «Խաղաղության խաչմերուկ» նախագծի բաղկացուցիչ մասն է։ Հայկական կողմը պարզաբանել է, որ նախագծի շրջանակներում նախատեսվում է Հայաստանում գրանցել ընկերություն, որի բաժնետոմսերը կբաժանվեն Հայաստանի և Միացյալ Նահանգների միջև, բայց դա չի նշանակում Միացյալ Նահանգների ներկայությունը տարածաշրջանի անվտանգության ոլորտում։
Վաշինգտոնյան պայմանավորվածություններից օրեր անց Իրանի ԱԳ նախարար Աբբաս Արաղչին հայտարարել էր, որ այդ պայմանավորվածություններում Իրանի շահերն ու կարմիր գծերը հաշվի են առնվել։
Հետևեք մեզ տելեգրամում
