Իրանական Rasanews լրատվակայքն անդրադարձել է Ադրբեջան-Իսրայել հարաբերություններին և Իրանի վրա դրանց ազդեցությանը: Կայքն ընդգծել է, որ Ադրբեջանն Իսրայելի անվտանգային ու ռազմական ամենասերտ գործընկերներից մեկն է դարձել և դերակատարում ունեցել Իրանի դեմ Իսրայելի հետախուզական և այլ գործողություններում:
«Իսրայելի կողմից Իրանի դեմ ռազմական ագրեսիայի ժամանակ եբրայական լրատվամիջոցների կողմից հրապարակված ապացույցները ցույց են տալիս, որ Ադրբեջանը տեղյակ էր գործողության մասին և իր ենթակառուցվածքները տրամադրել էր Թել Ավիվին։ Այս համագործակցությունը, մասնավորապես՝ Կասպից ծովից անօդաչու թռչող սարքերի հարձակումները, Բաքվի դերակատարման նոր կողմեր են բացահայտում: Փորձագետները կարծում են, որ Ադրբեջանը, ապավինելով Իսրայելի աջակցությանը, ձգտում է ամրապնդել իր դերը Իրանի ազդեցությունը սահմանափակելու գործում։ Եվ այս նպատակին հասնելու համար իրականացնում է տարբեր գործողություններ՝ սկսած հետախուզական կայանների ստեղծումից մինչև Իրանին էներգետիկ ուղիներից և տարածաշրջանային միջանցքներից հեռացնելու փորձերը։Հաշվի առնելով Բաքու-Թել Ավիվ անվտանգության համագործակցության ծավալը և վերջին հարձակումներում նրա դերը՝ վերլուծաբանները ընդգծում են, որ Թեհրանը պետք է դուրս գա իր պասիվ վիճակից և հստակ ուղերձ հղի տարածաշրջանային երկրներին. Իրանի անվտանգության դեմ ուղղված ցանկացած սպառնալիք ուղղակի հետևանքներ է ունենալու»,- գրել է կայքը։
Հետևեք մեզ տելեգրամում
