Մենք բոլորս տեսնում ենք, որ մեր հարաբերությունները ներկայումս անցնում են դժվարին շրջան, փորձության են ենթարկվում աշխարհաքաղաքական անկայունության պայմաններում, որոնց ալիքները հասնում են նաև Հարավային Կովկասի տարածաշրջան, հայտարարել է Հայաստանում ՌԴ դեսպան Սերգեյ Կոպիրկինը:
Այս մարտահրավերների հաղթահարումը պահանջում է քաղաքական կամք, ռազմավարական հեռատեսություն և իմաստություն երկու կողմերից՝ երկկողմ համագործակցության կուտակված ուժը պահպանելու համար: Նա անդրադարձել է Հայաստանի եվրոպական ինտեգրման ուղղությանը, որն իրավական հիմք է ստացել «ՀՀ Եվրոպական Միությանը անդամակցության գործընթացի մեկնարկի մասին» օրենքի տեսքով՝ այս տարվա ապրիլին:
«Սակայն, պարզ է, և դա բազմիցս ընդգծել է Ռուսաստանի ղեկավարությունը, որ ԵԱՏՄ-ին և ԵՄ-ին միաժամանակյա անդամակցությունն անհնար է։ Միևնույն ժամանակ, ԵՄ բարձրաստիճան պաշտոնյաները չեն թաքցնում իրենց մտադրությունը՝ ԵՄ-ի և Երևանի հարաբերությունները դիտարկել Հայաստանի դաշնակից Ռուսաստանին «ռազմավարական պարտություն» հասցնելու իրենց ծրագրերի համատեքստում։ Դեկտեմբերի 3-ին ԵՄ արտաքին գործերի և անվտանգության քաղաքականության հարցերով գերագույն ներկայացուցիչ Կայա Կալլասը հստակեցրեց, որ ակնկալում է, որ Հայաստանը կմիանա հակառուսական անօրինական պատժամիջոցներին։ Բրյուսելը, ըստ երևույթին, չի հաշվի առնում այն հետևանքները, որոնք դա կարող է ունենալ Հայաստանի տնտեսության համար» , – շեշտել է ՌԴ դեսպանը։
Կոպիրկինը նշել է, որ Հայաստանը պետական «Ռոսատոմ» կորպորացիայից ստացել է մանրամասն և շատ բարենպաստ առաջարկների փաթեթ, որը պատրաստ է հնարավորինս շուտ սկսել իրականացումը։
«Մեծամորի ատոմակայանում նոր էներգաբլոկ կառուցելու ծրագրերի վերաբերյալ գնդակը Երևանի դաշտում է։ Կցանկանայի ընդգծել, որ հուսալի, ապացուցված տեխնոլոգիաների առկայության կամ գրավիչ ֆինանսական պարամետրերի առումով կենսունակ այլընտրանքներ չկան» , – նշել է Կոպիրկինը։
Հետևեք մեզ տելեգրամում
