2025 թվականի արդյունքներով դեպի Ռուսաստան հայկական արտահանման ծավալը մոտ է 3 միլիարդ դոլարին։ Այս մասին փետրվարի 26-ին Երևանում Գորչակովի հիմնադրամի կողմից կազմակերպված «Եվրասիական երկխոսություն. Հայաստան» միջազգային վերլուծական ծրագրի շնորհանդեսի ժամանակ հայտարարել է Հայաստանում ՌԴ առևտրային ներկայացուցիչ Սերգեյ Սոլոմինը։
Նրա խոսքով՝ խոսելով Եվրասիական տնտեսական միության մասին, կարևոր է հեռու մնալ վերացական ձևակերպումներից։ «Անհրաժեշտ է այն դիտարկել որպես կիրառական տնտեսական մեխանիզմ, որն արդեն իսկ չափելի արդյունքներ է ապահովում ազգային տնտեսությունների համար, այդ թվում՝ Հայաստանի։ 2025 թվականի արդյունքներով կարելի է վստահորեն ասել, որ եվրասիական ուղղությունը առանցքային է Հայաստանի արտաքին տնտեսական կապերի համար։ Երկրի համախառն արտաքին առևտրաշրջանառությունը գերազանցել է 21 միլիարդ դոլարը, որից 8,2 միլիարդ դոլարը բաժին է ընկել ԵԱՏՄ անդամ պետություններին», – նշել է Սոլոմինը։
Նա հավելել է, որ հայկական արտահանման ընդհանուր ծավալը գերազանցել է 8 միլիարդ դոլարը, որից ավելի քան 3,2 միլիարդ դոլարը մատակարարվել է ԵԱՏՄ շուկա։ Միևնույն ժամանակ, Ռուսաստանի Դաշնությունը պահպանում է հանրապետության հիմնական առևտրային գործընկերոջ կարգավիճակը։ «Սա վկայում է այն մասին, որ ԵԱՏՄ շուկան Հայաստանի համար ոչ թե տեսական հեռանկար է, այլ իրապես գործող տնտեսական տարածություն», – ասել է պաշտոնյան։
Ռուսաստանի առևտրային ներկայացուցիչն ընդգծել է, որ այսօր ԵԱՏՄ-ն միայն ապրանքների առևտուր չէ, այլև արդյունաբերական կոոպերացիա, տեխնոլոգիական և ՏՏ նախագծեր, համատեղ կրթական ծրագրեր, թվային ծառայությունների և էլեկտրոնային հարթակների զարգացում, մասնակցություն անդրսահմանային արտադրական շղթաներին, ինչպես նաև նոր լոգիստիկ երթուղիների ձևավորում։ Զգալի մարդկային կապիտալ, զարգացած ՏՏ ոլորտ և արտահանմանն ուղղված բիզնես ունեցող Հայաստանի համար՝ եվրասիական ինտեգրումը հնարավորություն է ստեղծում ազգային նախագծերը մասշտաբավորել հարյուր միլիոնավոր սպառողներ ունեցող շուկայի վրա։
Հայաստանում Ռուսաստանի առևտրային ներկայացուցչությունն իր առանցքային խնդիրն է համարում եվրասիական ինտեգրումը տեղափոխել կոնկրետ նախագծերի հարթություն, որոնք հասկանալի կլինեն բիզնեսի, արդյունաբերական ձեռնարկությունների, ինժեներական կենտրոնների և ստարտափների համար։
Հետևեք մեզ տելեգրամում
