Ապրիլի 15-ին ԱՄՆ-ն և «ՀԱՄԱՍ»-ը Գազայի հրադադարից հետո առաջին անգամ ուղիղ բանակցություններ են վարել Կահիրեում՝ փորձելով առաջ մղել ԱՄՆ միջնորդությամբ ձեռք բերված համաձայնագրի իրականացումը։ Այս մասին հայտնել է «CNN»-ը։
ԱՄՆ պատվիրակությունը գլխավորել է ավագ խորհրդական Արյեհ Լայթսթոունը, որը հանդիպել է «ՀԱՄԱՍ»-ի գլխավոր բանակցող Խալիլ ալ-Հայյայի հետ։ Բանակցություններին մասնակցել է նաև Գազայի հարցերով «Խաղաղության խորհրդի» բարձր ներկայացուցիչ Նիկոլայ Մլադենովը։ ԱՄՆ պետդեպարտամենտը հրաժարվել է մեկնաբանել ընթացիկ բանակցությունները։
Հանդիպման ընթացքում ալ-Հայյան ընդգծել է, որ Իսրայելը պետք է լիովին իրականացնի հրադադարի առաջին փուլի իր պարտավորությունները՝ ներառյալ հարվածների դադարեցումն ու հումանիտար օգնության ծավալների ավելացումը, որպեսզի հնարավոր լինի անցնել հաջորդ փուլին։
Հիշեցնենք, որ հոկտեմբերին ձեռք բերված հրադադարը դադարեցրել էր երկու տարի տևած պատերազմը Գազայում, սակայն չէր լուծել տարածքի ապագայի վերաբերյալ հիմնական հարցերը՝ այդ թվում «ՀԱՄԱՍ»-ի դերը կառավարման և անվտանգության համակարգում։ Միաժամանակ, «ՀԱՄԱՍ»-ը վերահաստատել էր իր վերահսկողությունը Գազայի մի մասում, իսկ Իսրայելը շարունակում է հարվածներ հասցնել տարածքին։
Բանակցությունները տեղի են ունեցել այն բանից հետո, երբ Լայթսթոունը հանդիպել էր Իսրայելի վարչապետ Բենիամին Նեթանյահուի հետ՝ փորձելով ապահովել Իսրայելի հանձնառությունը հրադադարի առաջին փուլի պայմանների լիարժեք իրականացման վերաբերյալ։ Իսրայելը պատրաստակամություն էր հայտնել կատարել այդ պայմանները, եթե «ՀԱՄԱՍ»-ը համաձայնի զինաթափվել։
«ՀԱՄԱՍ»-ը և Գազայում գործող մի շարք միջազգային կազմակերպություններ պնդել են, որ Իսրայելը չի պահպանում համաձայնագրի պայմանները, ինչը Իսրայելը հերքել է՝ հակադարձելով, որ խախտումներ է թույլ տալիս նաև «ՀԱՄԱՍ»-ը։
Պաղեստինի առողջապահության նախարարության տվյալներով՝ հրադադարից հետո Գազայում իսրայելական հարվածների հետևանքով զոհվել է ավելի քան 765 մարդ։
«ՀԱՄԱՍ»-ի բարձրաստիճան ներկայացուցիչներից մեկը բանակցային առաջարկը համարել է անհավասարակշռված՝ նշելով, որ այն առաջնահերթություն է տալիս Իսրայելի անվտանգությանը՝ հետաձգելով պաղեստինցիների հումանիտար և քաղաքական իրավունքների հարցերը։ Նրա խոսքով՝ առաջարկը փաստացի սահմանափակում է գործընթացը մեկ հիմնական կետով՝ զինաթափմամբ, իսկ մյուս պարտավորությունները մղվում են երկրորդ պլան։ Նա նաև նշել է, որ միջնորդները զգուշացրել են՝ առաջարկը չընդունելու դեպքում պատերազմը կարող է վերսկսվել։
Հետևեք մեզ տելեգրամում
