Թեհրանը դադարեցնում է ԱՄՆ-ի հետ միջնորդների միջոցով իրականացվող երկխոսությունն ու տեքստերի փոխանակումը: Այս մասին հայտնում է իրանական Tasnim գործակալությունը՝ հղում անելով իրազեկ աղբյուրին։ Լրատվամիջոցի փոխանցմամբ՝ որոշումը պայմանավորված է Լիբանանում իսրայելական հարվածների շարունակմամբ։
«Իրանցի պաշտոնյաներն ընդգծել են Գազայում և Լիբանանում ռազմական գործողությունների դադարեցման, ինչպես նաև Լիբանանի տարածքներից իսրայելական ուժերի դուրսբերման անհրաժեշտությունը։ Մինչև այդ պահանջների կատարումը որևէ երկխոսություն չի իրականացվի»,-նշել է Tasnim-ը։
Գործակալությունը նաև հայտնել է, որ Իրանը և «Դիմադրության ճակատը» քննարկում են Հորմուզի նեղուցի ամբողջական փակման և այլ ուղղություններով, այդ թվում՝ Բաբ էլ-Մանդեբի նեղուցում գործողությունների ակտիվացման հնարավորությունը։
Ավելի վաղ Իսրայելի վարչապետ Բենիամին Նեթանյահուն հայտարարել էր Լիբանանում ցամաքային գործողությունների ընդլայնման մասին: Թեհրանը շարունակում է պնդել, որ ԱՄՆ և Իսրայելի հետ հրադադարի մաս պետք է լինեն նաև Գազան ու Լիբանանը:
Հետևեք մեզ տելեգրամում
