Իրանի առաջնորդը հայտարարել է Հորմուզի նեղուցում «նոր դարաշրջանի» մեկնարկի մասին

Իրանի գերագույն առաջնորդ Մոջթաբա Խամենեին ժողովրդին ուղղված իր ուղերձում հայտարարել է տարածաշրջանային անվտանգության ամրապնդման և Պարսից ծոցում արտաքին ուժերի դերի վերանայման անհրաժեշտության մասին՝ շեշտելով, որ Իրանը թույլ չի տա Հորմուզի նեղուցի օգտագործումն ի շահ երրորդ երկրների։

Նա ընդգծել է, որ Վաշինգտոնի քաղաքականությունը Թեհրանի նկատմամբ ձախողվել է, իսկ Միացյալ Նահանգների ներկայությունը տարածաշրջանում այլևս չի համապատասխանում ապագայի տեսլականին՝ հավելելով, որ հազարավոր կիլոմետրեր հեռվից եկած օտարերկրացիներն այստեղ տեղ չունեն, «նրանց տեղը ծովի հատակն է»։

Խամենեին նաև նշել է, որ տարածաշրջանի անկայունությունը արտաքին միջամտության հետևանք է, մինչդեռ հարևան պետությունները Իրանի հետ ունեն ընդհանուր շահեր և ճակատագիր։ Եզրափակելով ուղերձը՝ նա վստահություն է հայտնել, որ «հզոր Իրանի ռազմավարության» շնորհիվ ձևավորվող նոր կարգը կբացի տարածաշրջանային ինքնուրույնության և բարգավաճման նոր դարաշրջան՝ զերծ արտաքին գերիշխող ազդեցությունից։