Հարավային Կովկասի և Վրաստանի ճգնաժամի հարցերով ԵՄ հատուկ ներկայացուցիչ Մագդալենա Գրոնոն թուրքական ԶԼՄ-ներից մեկին տված հարցազրույցում հույս է հայտնել, որ Հայաստան-Թուրքիա սահմանը կբացվի՝ նշելով, որ ԵՄ-ն աջակցում է այդ գործընթացին։
Գրոնոն նշել է․
«Սա իսկապես շատ կարևոր շրջադարձային պահ է ամբողջ տարածաշրջանի համար։ Անցած ամռանը Վաշինգտոնում Ադրբեջանի և Հայաստանի միջև կայացած գագաթնաժողովից հետո մենք հետևում ենք դրական դինամիկային, որն արտացոլվել է նաև Թուրքիայի և Հայաստանի միջև կարգավորման գործընթացում։ Խոսքը իսկապես մեծ փոփոխությունների մասին է, որոնք կարող են օգուտ բերել տարածաշրջանին, տարածաշրջանի ժողովուրդներին և նաև գործընկերներին»։
Հատուկ ներկայացուցիչն ընդգծել է, որ այս գործընթացները կարող են տարածաշրջանին բերել կայունություն և բարգավաճում։
Գրոնոն նաև խոսել է Ադրբեջանի, Հայաստանի և Թուրքիայի միջև սահմանների բացման կարևորության մասին․
«Սա կարող է ճանապարհ բացել այնպիսի կապերի համար, որոնք կմիավորեն Եվրոպան, Սև ծովը, Թուրքիան, ամբողջ Հարավային Կովկասը և Կենտրոնական Ասիան։ Կարող է ձևավորվել հզոր տնտեսական ցանց, որը կներառի տրանսպորտային, էներգետիկ և թվային կապերը։ Հույս ունենք, որ այս սահմանները կբացվեն, որպեսզի տարածաշրջանը կարողանա գործել որպես միասնական ամբողջություն»։
Անդրադառնալով Ռուսաստանի դերին՝ Գրոնոն նշել է․
«Մեր տեսանկյունից կարևոր է, որ բոլոր տարածաշրջանային դերակատարները աջակցեն կարգավորման գործընթացներին և իսկապես առաջնահերթ համարեն տարածաշրջանի շահերը։ Մենք հավատում ենք, որ տարածաշրջանի շահերից է բխում լիակատար կարգավորումը, խաղաղ գործընթացի ամբողջական առաջխաղացումը և սահմանների լիովին բացումը»։
Հետևեք մեզ տելեգրամում
