ՌԴ անվտանգության խորհրդի փոխնախագահ Դմիտրի Մեդվեդևը հայտարարել է, թե ՀՀ վարչապետ Նիկոլ Փաշինյանն ընտրել է Մոսկվայի հետ հարաբերությունները խզելու ուղին, որը «կվնասի ամբողջ հայ ժողովրդին և երկրի տնտեսությանը»։ Այս մասին հայտնել է «ՌԻԱ Նովոստի»-ն։
Մեդվեդևը նաև ասել է՝ Ռուսաստանի և Հայաստանի հարաբերությունների զարգացման համար «անհրաժեշտ է կառուցողական ղեկավարություն Երևանում, և ուղու ընտրությունը կախված է Հայաստանի ժողովրդից․ «Մենք պատրաստ ենք հետագայում էլ շարունակել զարգացնել արդյունավետ, փոխշահավետ համագործակցությունը և հավասար փոխգործակցությունը Հայաստանի և նրա ժողովրդի հետ։ Բայց որպեսզի դա տեղի ունենա, մեր դաշնակիցը պետք է ունենա կառուցողական ղեկավարություն, որը ցանկանում է բարեկամանալ Ռուսաստանի հետ։ Ուղու ընտրությունը մնում է Հայաստանի ժողովրդինը»,- հավելել է նա։
Խոսելով ՀԱՊԿ-ին մասնակցությունը սառեցնելու մասին՝ Մեդվեդևն ասել է, թե հենց ՀԱՊԿ-ի շրջանակում Ռուսաստանը «միշտ պատրաստ է պաշտպանել Հայաստանը իր կողմից ճանաչված սահմաններում»։ Մեդվեդևն անդրադարձել է նաև ԵԱՏՄ-ին՝ հայտարարելով, թե Փաշինյանը «փորձում է Հայաստանը տանել դեպի ԵՄ՝ պահպանելով ԵԱՏՄ-ից ստացվող օգուտները»։ Միաժամանակ, ռուսաստանցի պաշտոնյան նախազգուշացրել է՝ Հայաստանը ստիպված կլինի ռուսական գազը գնել եվրոպական գներով, ինչը ներկայիս սակագներից երեք անգամ թանկ է։
Հետևեք մեզ տելեգրամում
