Վրաստանի իշխանությանը հարող «Ժողովրդի ուժը» շարժման անդամ, վերլուծաբան Դավիթ Քարթվելիշվիլին ֆեյսբուքյան իր էջում կոշտ հարձակում է գործել ընդդիմադիր «Լելո» կուսակցության անդամ, Վրաստանի խորհրդարանի նախկին խոսնակ Դավիթ Ուսուփաշվիլիի վրա։ Քննադատության համար առիթ է հանդիսացել Ուսուփաշվիլիի արած հայտարարությունը, որտեղ նա քննադատել է իշխանության թիկունքում կանգնած միլիարդատեր Բիձինա Իվանիշվիլիին՝ նրան մեղադրելով ժողովրդավարական բարեփոխումները տապալելու մեջ։
Դավիթ Քարթվելիշվիլին իր գրառման մեջ, թիրախավորելով Ուսուփաշվիլիին, վերջինիս վարկաբեկելու նպատակով շահարկել է նրա՝ իբր էթնիկ հայ լինելու պնդումը։ Հեղինակն ուղղակիորեն փորձել է կապ ստեղծել անձին վերագրվող ազգային ծագման և նրա ենթադրյալ «հակապետական» գործունեության միջև։
Քարթվելիշվիլին գրել է․ «Քանի որ հիշատակեցինք Վրաստանն ու վրացի լինելը, ասենք նաև, որ այդ միասնության հետ Դավիթ Ուսուփաշվիլիին ոչինչ չի կապում՝ ո՛չ արյամբ, ո՛չ մենթալիտետով և ո՛չ էլ հայրենիքի ընկալմամբ։ Ինչպես հայտնի է, մտերիմների շրջապատում պարոն Դավիթը չի թաքցնում, որ էթնիկ հայ է։ Դա, իհարկե, ոչինչ չի փոխում, բայց պարոն Դավիթը որ իր գործունեությամբ գործում է Վրաստանի շահերի դեմ և կատարում է իր օտարերկրյա տերերի հանձնարարականները, ահա սա իսկապես խայտառակություն է ու գարշելի»։
Հետևեք մեզ տելեգրամում
