Վրաստանի խորհրդարանի եվրոպական ինտեգրման կոմիտեի նախագահ Լևան Մախաշվիլին քննադատել է Եվրամիության որոշ կառույցների մոտեցումը Վրաստանի նկատմամբ՝ նշելով, որ հարաբերությունները սխալ քաղաքականության հետևանքով վնասվել են։
«Imedi TV»-ին տված հարցազրույցում նա հայտարարել է, որ ԵՄ որոշ անդամ երկրներ, մասնավորապես Բալթյան և Հյուսիսային Եվրոպայի մի շարք պետություններ, Վրաստանին չեն դիտարկում որպես հավասար գործընկեր, այլ օգտագործում են որպես ավելի լայն աշխարհաքաղաքական գործընթացների մաս։ Մախաշվիլիի խոսքով՝ նման մոտեցումը կապված է «պատերազմական օրակարգի» հետ և չի արտացոլում ԵՄ ամբողջ դիրքորոշումը, քանի որ Բրյուսելում կան նաև տարբեր տեսակետներ։
Նա նշել է, որ որոշ եվրոպական կառույցներ, այդ թվում՝ ԵՄ արտաքին քաղաքական ծառայության ղեկավար Կայա Կալլասի գրասենյակը մեծ ազդեցություն են ունեցել Վրաստանի վերաբերյալ քաղաքականության ձևավորման վրա, ինչը, նրա գնահատմամբ, հանգեցրել է հարաբերությունների ձախողման։ Վրաստանի պաշտոնյան հույս է հայտնել, որ Եվրամիությունը ժամանակի ընթացքում կվերանայի իր մոտեցումները և կվերականգնի հարաբերությունները Վրաստանի հետ՝ հավասարության և արդարության սկզբունքների հիման վրա։
Հետևեք մեզ տելեգրամում
