Եվրոպական միությունը Հայաստանին է նվիրաբերել նոր սերնդի հեռակառավարվող ականազերծման մեքենա, որը կօգտագործվի ականազերծման աշխատանքներում և սահմանազատման գործընթացում։
«Արմենպրես»-ի հաղորդմամբ՝ այս մասին լրագրողների հետ ճեպազրույցում հայտարարել է Եվրոպական հանձնաժողովի Արտաքին քաղաքականության գործիքների ծառայության (FPI) ղեկավար Պետեր Վագները՝ նշելով, որ վերոնշյալ մեքենան կշռում է մոտ 20 տոննա։
Վագներն ընդգծել է, որ մեքենան շատ ավելի լայն միջոցառումների և նախագծերի փաթեթի մաս է կազմում, որը Եվրոպական Միությունը ներդրել է Հայաստանում խաղաղության գործընթացի համար: Այս փաթեթը, մասնավորապես, ներառում է ականազերծման ոլորտում մի շարք գործողություններ։
«Այս մեքենան ականազերծման վերաբերյալ 5.5 միլիոն եվրոյի փաթեթի մաս է կազմում, որը ներառում է բազմաթիվ լրացուցիչ տարրեր, շատ ուսուցում, քանի որ մեքենաները տեխնիկապես դժվար է օգտագործել: Փաթեթը ներառում է նաև անվտանգության, առաջին բուժօգնության սարքավորումներ, որոնք տեղում ականազերծման գործողությունների մաս են կազմում: Այն ներառում է նաև մեծ քանակությամբ պահեստամասեր, քանի որ մեքենան հեռակառավարմամբ է աշխատելու շատ դժվարին, երբեմն լեռնային միջավայրերում»,-մանրամասնել է Պետեր Վագները:
Հետևեք մեզ տելեգրամում
