ՀՀ վարչապետ Նիկոլ Փաշինյանը հայտարարել է, որ ԹՐԻՓՓ նախագծի իրականացումը ոչ միայն համապատասխանում է Հայաստանի, այլև Իրանի շահերին՝ նպաստելով երկու երկրների միջև առևտրատնտեսական կապերի ընդլայնմանը և Պարսից ծոց–Սև ծով երկաթուղային կապի ձևավորմանը: Փոխանցում է «Արմենպրես»-ը։
Կառավարության նիստից հետո լրագրողների հետ ճեպազրույցում վարչապետը, անդրադառնալով Հայաստանում Իրանի դեսպան Խալիլ Շիրղոլամիի մտահոգություններին, նշել է, որ նախագծի իրականացումն անկեղծորեն բխում է նաև Իրանի տնտեսական շահերից։
«ԹՐԻՓՓ նախագծի իրականացմամբ մենք կբացենք Պարսից ծոցից դեպի Սև ծով երկաթուղային կապը, ինչի արդյունքում Հայաստանի և Իրանի միջև առևտրատնտեսական հարաբերությունների հնարավորությունները էականորեն կընդլայնվեն։ Կընդլայնվեն նաև Իրանի Իսլամական Հանրապետության առևտրատնտեսական հնարավորությունները։ ԹՐԻՓՓ նախագծի իրականացումն անկեղծորեն և ուղղակիորեն բխում է նաև Իրանի շահերից»,- ասել է Փաշինյանը։
Վարչապետը նշել է, որ Հայաստանը պատրաստ է բաց և թափանցիկ քննարկումների Իրանի հետ՝ ընդգծելով, որ անհրաժեշտ է հստակ ձևակերպել առկա մտահոգությունները։
«Մենք թափանցիկ ենք և պատրաստ ենք պատասխանել ցանկացած հարցի։ Պետք է հստակ ձևակերպվի, թե մտահոգությունն ինչի մասին է։ Համոզված ենք, որ բոլոր մտահոգությունները հնարավոր կլինի փարատել»,- ընդգծել է նա։
Փաշինյանի խոսքով՝ Հայաստանը շարունակելու է աշխատել նախագծի շուրջ բոլոր շահագրգիռ գործընկերների հետ, այդ թվում՝ Իրանի, Ռուսաստանի, Վրաստանի, Ադրբեջանի, Թուրքիայի, Եվրոպական միության, Կենտրոնական Ասիայի երկրների և Չինաստանի։
«Սա գլոբալ նախագիծ է, և մենք ցանկանում ենք հնարավորինս արագ սկսել դրա իրականացումը։ Հույս ունեմ, որ արդեն այս տարվա աշնանը գետնի վրա կմեկնարկեն առաջին շինարարական աշխատանքները»,- հավելել է վարչապետը։
Հիշեցնենք, որ ավելի վաղ՝ հուլիսի 8-ին, Հայաստանում Իրանի դեսպան Խալիլ Շիրղոլամին հայտարարել էր, որ Թեհրանի մտահոգությունը կապված է Հայաստանի սահմանների հարևանությամբ ԱՄՆ-ի հնարավոր ներկայության հետ։ Նրա խոսքով՝ հայկական կողմը հավաստիացրել է, որ նախագծի իրականացումը Իրանի համար որևէ անվտանգային սպառնալիք չի ստեղծի, սակայն անհրաժեշտ է մշակել մեխանիզմներ՝ հնարավոր ռիսկերը կանխելու և երկկողմ օրակարգում դրանք համատեղ քննարկելու համար։
Հետևեք մեզ տելեգրամում
