Ստամբուլի 11-րդ ծանր հանցագործությունների դատարանը, քննելով «Սումուդ նավատորմի» գործը, որոշում է կայացրել Իսրայելի վարչապետ Բենիամին Նեթանյահուի նկատմամբ Ինտերպոլի միջոցով միջազգային հետախուզում հայտարարել։ Այս մասին հայտնում են թուրքական ԶԼՄ-ները:
Նեթանյահուի և գործով անցնող մյուս ամբաստանյալների նկատմամբ հանրային քրեական գործ է հարուցվել մի շարք ծանր հոդվածներով։ Նրանք մեղադրվում են մարդկության դեմ ուղղված հանցագործությունների, ցեղասպանության, գույքի կանխամտածված վնասման, ավազակային հարձակման, դիտավորությամբ մարմնական վնասվածքներ պատճառելու, խոշտանգումների, տրանսպորտային միջոցների տեղաշարժի խոչընդոտման, ինչպես նաև մարդկանց առևանգելու և ապօրինի ազատությունից զրկելու մեջ։
Ստամբուլի դատարանի կողմից ընդունված այս որոշումն ուղղված է դատական գործընթացին Նեթանյահուի մասնակցությունն ապահովելուն։ Դատական վարույթը ներկայումս ընթացքի մեջ է:
Նշենք, որ «Սումուդ նավատորմը» միջազգային նախաձեռնություն է, որի նպատակն է նավերով մարդասիրական օգնություն հասցնել Գազա և ուշադրություն հրավիրել Գազայի շրջափակման ու հումանիտար իրավիճակի վրա։
Հետևեք մեզ տելեգրամում
