Իսլամական հեղափոխության պահապանների կորպուսի ռազմածովային ուժերը հայտարարել են, որ նախազգուշացումներն անտեսելու և «անօրինական ու վտանգավոր երթուղով» շարժվելու պատճառով Հորմուզի նեղուցում հարվածել ու կանգնեցրել են երեք նավթատար նավ։ Փոխանցում է իրանական IRNA լրատվական գործակալությունը:
ԻՀՊԿ-ն ընդգծել է, որ իրանական ուժերը շարունակում են լիակատար վերահսկողություն պահպանել նեղուցի նկատմամբ՝ զգուշացնելով, որ տարածաշրջանում նավագնացությանն ԱՄՆ-ի «անօրինական միջամտություններն ու հրահանգներն» անպատասխան չեն մնա։
Իր հերթին ԻՀՊԿ օդատիեզերական ուժերի հրամանատարությունը հայտնել է, որ բալիստիկ հրթիռներով հարվածներ են հասցվել Հորդանանի տարածքում տեղակայված ԱՄՆ զինված ուժերի ավիաբազային և հրամանատարական կենտրոնին։
Ըստ հայտարարության՝ գործողությունն իրականացվել է ի պատասխան «ամերիկյան բանակի ագրեսիվ գործողությունների»։ Իրանական կողմը շեշտել է, որ քանի դեռ Իսլամական Հանրապետության դեմ սպառնալիքներն ու գործողությունները շարունակվում են, դիմադրությունը չի դադարելու, և ԱՄՆ-ն պետք է վերջ տա Իրանի շահերի դեմ ուղղված միջամտություններին։
Հետևեք մեզ տելեգրամում
