Սաուդյան Արաբիան պատրաստվում է հութիների դեմ լայնամասշտաբ ռազմական գործողության։ The Guardian-ը, հղում անելով եմենական աղբյուրներին, նշում է, որ Էր Ռիադը ծրագրում է հարձակում իրականացնել ծովային և, հնարավոր է, ցամաքային ճանապարհով՝ նպատակ ունենալով ճեղքել Կարմիր ծովի հարավային հատվածում սաուդյան նավթի արտահանման վրա հութիների շրջափակումը։
Ըստ լրատվամիջոցի՝ սաուդյան զորքերն արդեն սկսել են դուրս գալ Եմենի արևելյան շրջաններից, ինչը, վերլուծաբանների գնահատմամբ, կարող է նախապատրաստություն լինել Եմենի կենտրոնական Ալ-Բայդա նահանգի ուղղությամբ ցամաքային գործողություններ սկսելու համար։
Միևնույն ժամանակ, Էր Ռիադը ակտիվորեն աշխատում է բազմազգ ռազմածովային կոալիցիա ձևավորելու ուղղությամբ՝ Կարմիր ծովում և Բաբ էլ-Մանդեբի նեղուցում առևտրային նավագնացության անվտանգությունն ապահովելու նպատակով։ Սաուդյան Արաբիայի պաշտպանության նախարարության տվյալներով՝ 14 պետություններ, այդ թվում՝ Թուրքիան, Պակիuտանը, Եգիպտոսը, Սուդանը և Ջիբութին, արդեն համատեղ հայտարարությամբ աջակցություն են հայտնել այդ նախաձեռնությանը։
Հիշեցնենք, որ Սաուդյան Արաբիայի և հութիների միջև լարվածության նոր ալիքը բռնկվել է հուլիսի 20-ին, երբ Սանայում և Կարմիր ծովի ափամերձ գոտում իշխող հութիները հայտարարեցին սաուդյան նավերի դեմ ծովային շրջափակում իրականացնելու մասին։ Խմբավորումը պնդում է, որ պատրաստ է հանել սահմանափակումները միայն այն դեպքում, երբ Սաուդյան Արաբիան դադարեցնի հութիների դեմ իրականացվող շրջափակումը։
Հետևեք մեզ տելեգրամում
