2026 թվականի սկզբից ի վեր Ադրբեջանի անվտանգային կառույցներում առնվազն 38 զինծառայող է մահացել: Այս մասին հայտնում է Կասպյան պաշտպանական հետազոտությունների ինստիտուտը:
Կազմակերպության վիճակագրության համաձայն՝ ըստ ամիսների գրանցվել են հետևյալ կորուստները. հունվարին՝ երեք, փետրվարին՝ չորս, մարտին՝ երկու, ապրիլին՝ հինգ, մայիսին՝ վեց, հունիսին՝ հինգ, հուլիսին՝ 11, իսկ օգոստոսին՝ երկու զինծառայող:
Մահացածներից 26-ը պաշտպանության նախարարության, ութը՝ պետական սահմանապահ ծառայության զինծառայող են, մեկը՝ ներքին զորքերի, մեկը՝ նախագահի անվտանգության ծառայության, մեկը՝ արտակարգ իրավիճակների նախարարության, իսկ ևս մեկը՝ զորահավաքային և զինվորական ծառայության հավաքագրման պետական ծառայության աշխատակից են:
Զինծառայողներից 12-ը մահացել է տարբեր հիվանդությունների հետևանքով, յոթը՝ ավտովթարներից, ևս յոթը՝ դժբախտ պատահարների հետևանքով: Բացի այդ, արձանագրվել է ինքնասպանության հինգ և անզգուշության հետևանքով մահվան մեկ դեպք: Վեց զինծառայողի մահվան պատճառը պաշտոնապես չի հրապարակվել:
Կասպյան պաշտպանական հետազոտությունների ինստիտուտի տվյալներով՝ 2025 թվականի ընթացքում Ադրբեջանի զինված ուժերում և ուժային այլ կառույցներում ոչ մարտական պայմաններում մահացել է 43 զինծառայող: Հատկանշական է, որ Ադրբեջանի պաշտպանության նախարարությունը և պետական մյուս կառույցները շարունակում են չհրապարակել զինծառայողների շրջանում գրանցվող մահվան դեպքերի վերաբերյալ պաշտոնական ամփոփ վիճակագրություն:
Հետևեք մեզ տելեգրամում
