Իրանը դիտարկում է Եվրոպայում ԱՄՆ-ի ռազմական թիրախներին հարվածելու հնարավորությունը՝ ԱՄՆ նախագահ Դոնալդ Թրամփի կողմից պատերազմի սրման դեպքում։ Այս մասին «Financial Times»-ին հայտնել են իրանական աղբյուրները։
Նրանց փոխանցմամբ՝ Իրանը քննարկում է Հարավարևելյան Եվրոպայում, այդ թվում՝ Բուլղարիայում գտնվող ամերիկյան օբյեկտներին հարվածելու հնարավորությունը։ Հնարավոր թիրախների թվում նշվել է նաև Կիպրոսը, որտեղ Մեծ Բրիտանիայի ռազմաբազա կա։ Իրանի հնարավոր պատասխանը, ըստ աղբյուրների, կախված կլինի Վաշինգտոնի գործողություններից։ Ըստ իրանական աղբյուրների՝ Թեհրանը պատրաստվում է ընդլայնել հակամարտության աշխարհագրությունը, եթե Թրամփը իրականացնի Իրանի ենթակառուցվածքներին հարվածելու նախկին սպառնալիքները։
Ավելի վաղ Իրանի Իսլամական հեղափոխության պահապանների կորպուսը նախազգուշացրել էր Մեծ Բրիտանիային, որ Իրանի դեմ հարձակման համար օգտագործվող ցանկացած ռազմաբազա կարող է դիտարկվել որպես օրինական թիրախ։
«Financial Times»-ը նշում է, որ Իրանի իշխանությունները պատերազմի վերսկսումը գնալով ավելի հավանական են համարում, ինչի ֆոնին Թեհրանը դիտարկում է հակամարտության հնարավոր ընդլայնման տարբերակները։
Հետևեք մեզ տելեգրամում
