Իրանն ու Թուրքիան պատրաստվում են ստորագրել պաշտոնական համաձայնագիր, որը վերաբերում է երկու երկրների միջև երկաթուղային կապի զարգացմանը։ Իրանի երկաթուղային ընկերության տնօրեն Ջաբարալի Զաքերիի խոսքով՝ համաձայնագիրն արդեն պատրաստ է, և առաջիկայում այն կստորագրեն Իրանի և Թուրքիայի տրանսպորտի նախարարները։
Զաքերին այս մասին հայտարարել է Արևմտյան Ատրպատական կատարած այցի ընթացքում՝ ներկայացնելով նաև Իրանի համար ռազմավարական նշանակություն ունեցող նոր երկաթուղային նախագծի մանրամասները։
Խոսքը 324 կիլոմետր երկարությամբ Խավարան-Թավրիզ-Մարանդ-Չեշմե Սորայա երկաթուղու մասին է, որի հիմնական նպատակներից մեկը, ըստ պաշտոնյայի, Իրանը Թուրքիային կապելն ու Արևելք-Արևմուտք տրանսպորտային միջանցքի դերն ամրապնդելն է։
Իրանի երկաթուղային ընկերության ղեկավարի խոսքով՝ նախագիծը սովորական տարածաշրջանային երկաթուղային ճանապարհ չէ, այլ միջազգային նշանակության ռազմավարական երթուղու մաս, որը Սարասխից մինչև Չեշմե Սորայա ձգվող ավելի լայն երկաթուղային ցանցի բաղադրիչ է։
Զաքերին ընդգծել է, որ նոր երկաթուղային կապը հնարավորություն կտա Իրանին ավելի ակտիվ դեր ստանձնել Չինաստանից դեպի Եվրոպա բեռնափոխադրումների ոլորտում։ Նախատեսվում է, որ երթուղով տարեկան հնարավոր կլինի տեղափոխել 15-20 միլիոն տոննա բեռ։
Միասնական տեխնիկական չափանիշների ապահովման նպատակով նախագծի երկարությունը 294 կիլոմետրից հասցվել է 324 կիլոմետրի։ Նախատեսվում է նաև մի քանի թունելների կառուցում։ Գնացքների առավելագույն արագությունը սահմանվելու է 110 կմ/ժ՝ բեռնատար, և 160 կմ/ժ՝ ուղևորատար գնացքների համար։ Նախագիծը նախատեսվում է իրականացնել երեք փուլով։ Առաջին փուլում կկառուցվի և կավարտվի երկգիծ երկաթուղային ճանապարհը։ Դրան կհաջորդեն ճանապարհի էլեկտրիֆիկացումը, ազդանշանային համակարգերի ներդրումն ու անհրաժեշտ շարժակազմի ապահովումը։
Զաքերիի փոխանցմամբ՝ միայն առաջին փուլի իրականացման համար անհրաժեշտ է մոտ 1,8 միլիարդ դոլար։ Ֆինանսավորման հարցում Իրանի Պլանավորման և բյուջեի կազմակերպությունն արդեն իրականացնում է անհրաժեշտ համակարգումները։
Նրա խոսքով՝ նախագծի համար ստացվել են անհրաժեշտ բոլոր թույլտվությունները, իսկ բնապահպանական ուսումնասիրություններն ավարտվել են։ Առաջիկա վեց ամիսների ընթացքում նախատեսվում է ավարտել մնացած հետազոտությունները և անցնել շինարարական աշխատանքների մեկնարկին։
Հետևեք մեզ տելեգրամում
