Մեծ Բրիտանիան թույլ կտա գաղտնազերծել իր կողմից մշակված տեխնոլոգիաների մի մասը, որպեսզի բրիտանա-ֆրանսիական նախագծմամբ SCALP թևավոր հրթիռները հնարավոր լինի արտադրել Ուկրաինայում։ Այս մասին հայտարարել է Մեծ Բրիտանիայի վարչապետը, փոխանցում է CNN-ը:
Ըստ լրատվամիջոցի՝ Փարիզը և Կիևը մտադիր են Ուկրաինայում SCALP թևավոր հրթիռների արտադրության գիծ բացել մինչև տարեվերջ։ Չնայած դրան՝ արտադրության ծավալների էական աճը կարող է մի քանի տարի պահանջել։ CNN-ի գնահատմամբ՝ այս քայլը կարող է էապես մեծացնել Ռուսաստանի խորքում գտնվող թիրախներին հարվածելու Կիևի հնարավորությունները։
Մեծ Բրիտանիայի հայտարարությունը կոշտ արձագանքի է արժանացել Ռուսաստանում։ Կրեմլի խոսնակ Դմիտրի Պեսկովը հայտարարել է, որ Լոնդոնը «մասնակցում է պատերազմին» և «յուղ է լցնում կրակի վրա»։
Ավելի վաղ Լոնդոնում Ռուսաստանի դեսպանատունը նախազգուշացրել էր, որ որքան խորը լինի Մեծ Բրիտանիայի ներգրավվածությունը և որքան մեծ՝ Ուկրաինային տրամադրվող աջակցությունը, այնքան Լոնդոնն «ավելի բարձր գին» է դրա համար վճարելու։
SCALP/Storm Shadow-ը եվրոպական MBDA ընկերության արտադրած հեռահար թևավոր հրթիռ է, որն Ուկրաինայի զինված ուժերը կիրառում են Su-24 և Mirage 2000 կործանիչներից։ Ուկրաինայի համար նման զենքի արտադրության ընդլայնումը կարևոր է հատկապես ստորգետնյա և ամրացված ռազմական օբյեկտների դեմ գործողությունների տեսանկյունից։ Դրանք ավելի դժվար թիրախներ են թեթև անօդաչու սարքերի համար, որոնք Կիևը հաճախ օգտագործում է նավթավերամշակման գործարանների, պահեստների և այլ ավելի խոցելի օբյեկտների դեմ։
Հետևեք մեզ տելեգրամում
