«Խաղաղության խաչմերուկի ապագան. Արհեստական բանականություն, անվտանգություն և թվային ինքնիշխանություն» թեմայով փորձագիտական կլոր սեղան-քննարկման ժամանակ «Արհեստական բանականություն և գլոբալ գործընկերություններ» ուղղության փոխնախագահ, «Enterprise Incubator Foundation»-ի ներկայացուցիչ Անահիտ Պարզյանը «Region monitor»-ի հետ զրույցում անդրադարձել է Հայաստանի՝ արհեստական բանականության ոլորտում մրցունակության հնարավորություններին։
Նրա խոսքով՝ Հայաստանի համար կարևոր է ոչ թե ավելի խելացի AI մոդելների ստեղծումը, որոնք արդեն հասանելի են նաև այլ երկրներին, այլ արհեստական բանականության լայնամասշտաբ կիրառումը տնտեսության տարբեր ոլորտներում։
Պարզյանը նշել է, որ Հայաստանի համար հնարավոր ուղղություններից են գործակալական (Agentic AI) և ֆիզիկական (Physical AI) արհեստական բանականությունը, որոնք կարող են նպաստել տնտեսական զարգացման մասշտաբավորմանը։
Նա նշել է, որ Հայաստանը կարող է նաև ստեղծել նոր մոդելներ՝ դրանցում ներառելով հայկական բաղադրիչ, այդ թվում՝ լեզվական և բնապահպանական տվյալներ։ Այդ նպատակով կարևոր է նաև տվյալների որակը։
«Եթե մենք ունենք ոչ մաքուր տվյալների կույտ, մենք չենք կարողանա ստեղծել ճշգրիտ տվյալների պրոյեկցիա և չենք կարողանա կիրառել AI բանաձևերը ավելի ճշգրիտ որոշումների կայացման մեջ»,- նշել է Պարզյանը։
Նա ընդգծել է, որ առաջիկա 3-5 տարիներին AI-ի կիրառումը տնտեսական աճի վերածելու համար հնարավոր է սկսել փոքր և միջին ձեռնարկություններից՝ դրանց գործունեության մեջ AI գործիքներ ներդնելով և այդ փորձը հետագայում մասշտաբավորելով։ Պարզյանի խոսքով՝ միաժամանակ անհրաժեշտ են մեծ ներդրումներ հետազոտությունների ոլորտում՝ նոր տեխնոլոգիական հնարավորություններ բացահայտելու համար։
Հետևեք մեզ տելեգրամում
