ԱՄՆ ֆինանսների նախարարությունը նոր պատժամիջոցներ է սահմանել Ռուսաստանի պետական վերահսկողության տակ գտնվող «VTB Bank»-ի նկատմամբ՝ Իրանի հետ համագործակցության և Թեհրանի կողմից պատժամիջոցները շրջանցելուն աջակցելու մեղադրանքով։ Այս մասին հայտնում է «CNBC»-ն։
ԱՄՆ ֆինանսների նախարարության պնդմամբ՝ «VTB Bank»-ը աջակցել է Իրանի կողմից պատժամիջոցների շրջանցմանը, այդ թվում՝ պատժամիջոցների տակ գտնվող իրանական բանկերի հետ համագործակցելու միջոցով։
«VTB Bank»-ն արդեն իսկ ԱՄՆ պատժամիջոցների տակ էր: Նախարարության տվյալներով՝ նոր սահմանափակումները կարող են արգելափակել առնվազն տասնյակ միլիոնավոր դոլարների ֆինանսական միջոցներ։
«CNBC»-ի փոխանցմամբ՝ նոր պատժամիջոցները կարող են անուղղակի ազդեցություն ունենալ նաև Չինաստանի վրա, քանի որ այն Իրանի խոշորագույն առևտրային գործընկերն ու նավթի գնորդն է։ «VTB Bank»-ը, ըստ հրապարակման, միակ ռուսական բանկն է, որը մասնաճյուղ ունի Չինաստանում։
ԱՄՆ ֆինանսների նախարար Սքոթ Բեսենթը հայտարարել է, որ Վաշինգտոնը շարունակելու է թիրախավորել Իրանի ֆինանսական, տեխնոլոգիական և այլ աջակիցներին։
Հետևեք մեզ տելեգրամում
