Վրաստանի նախկին վարչապետ Իրակլի Ղարիբաշվիլին բանտից հրապարակել է իր հերթական՝ յոթերորդ նամակը, որում կոշտ քննադատության է ենթարկել նախկին կուսակիցներին՝ «Վրացական երազանքին» մեղադրելով Միխեիլ Սաակաշվիլիի կառավարման ժամանակաշրջանի մեթոդներին վերադառնալու մեջ։ Այս մասին հայտնում է Newsgeorgia-ն:
«Դուք արդեն գնում եք Սաակաշվիլիի ճանապարհով և վերադարձնում «Ազգային շարժման» կառավարման մեթոդները»,- գրել է Ղարիբաշվիլին։
Նրա պնդմամբ՝ գործող իշխանության քաղաքականությունն ու գործողությունները «հսկայական, անուղղելի վնաս» են հասցրել ինչպես պետությանը, այնպես էլ իշխող կուսակցությանը։ «Ձեր անհեռատես քաղաքականությամբ և գործողություններով երկիրը ներքաշեցիք շարունակական քաոսի և անվերջ ճգնաժամի մեջ, շփոթեցիք նույնիսկ ձեր սեփական ընտրողներին, զայրացրեցիք մարդկանց ու ընտանիքներին, հասարակության մեջ առաջացրեցիք անհուսության, անկայունության և անկանխատեսելի ապագայի վախի զգացում»,- նշվում է նամակում։
Նոր նամակում Ղարիբաշվիլին կրկին անդրադարձել է իր դեմ հարուցված քրեական գործի պատճառներին։ Նա պնդում է, որ իր նկատմամբ քրեական հետապնդումը քաղաքական դրդապատճառներ ունի, իսկ դրա նպատակը եղել է իրեն վարկաբեկելը, քաղաքականապես չեզոքացնելը և քաղաքականություն հնարավոր վերադարձը կանխելը։
Ղարիբաշվիլին նշել է, որ սկզբում իրեն խոստացել էին, որ բանտում «ոչ մի օր չի անցկացնի» և կստանա պայմանական պատիժ։ Սակայն, նրա խոսքով, մեղավորությունն ընդունելուց և գրավով ազատ արձակվելուց հետո՝ հունվարի 4-ին, իրեն տեղեկացրել են, որ պայմանները փոխվել են, և նա պետք է հինգ տարվա ազատազրկման դատապարտվի, իսկ հետագայում նաև նոր մեղադրանք են առաջադրել:
«Բիձինա Իվանիշվիլիի հետ իմ 20-ամյա հարաբերությունների և նրա նկատմամբ ունեցած վերաբերմունքիս պատճառով ես լուռ գնացի քաղաքական սպանդի և նստեցի բանտ, քանի որ չէի ցանկանում առճակատման մեջ մտնել»,- գրել է նախկին վարչապետը։
Ղարիբաշվիլին իր ուղերձը եզրափակել է ևս մեկ կոշտ ձևակերպմամբ․ «Դուք չարիք եք գործում։ Զգույշ եղեք»։
Հիշեցնենք, որ Իրակլի Ղարիբաշվիլին Վրաստանի վարչապետի պաշտոնը զբաղեցրել է երկու անգամ՝ 2013-2015 և 2021-2024 թվականներին։ Նա նաև տարբեր ժամանակներում եղել է ներքին գործերի և պաշտպանության նախարար։ 2024 թվականի սկզբին Ղարիբաշվիլին հրաժարական է տվել վարչապետի պաշտոնից և ստանձնել «Վրացական երազանքի» նախագահի պաշտոնը։
2025 թվականի ապրիլին նա հրաժարվել է նաև կուսակցության ղեկավարի պաշտոնից և հայտարարել ակտիվ քաղաքականությունից հեռանալու մասին՝ իրեն անվանելով կուսակցության «հավատարիմ զինվոր»։ Հրաժարականից ամիսներ անց նրա դեմ քրեական գործ է հարուցվել՝ փողերի լվացման մեղադրանքով:
Հետևեք մեզ տելեգրամում
