Վրաց պատրիարքարանը հայտարարություն է տարածել՝ մտահոգություն հայտնելով Ադրբեջանի տարածքում գտնվող Քուրմուխի Սուրբ Գևորգ եկեղեցում (Գուրմուկավանք) իրականացվող աշխատանքների կապակցությամբ։ Այս մասին հայտնում են վրացական ԶԼՄ-ները:
Հայտարարության մեջ մասնավորապես նշված է․ «Ճիշտ է, Քուրմուխի տաճարն այժմ գտնվում է Ադրբեջանի Հանրապետության տարածքում, սակայն այն մեր երկրի և եկեղեցու պատմական և հոգևոր ժառանգության շատ կարևոր հուշարձան է։ Բնականաբար, այս փաստը մեր հասարակության մեջ սուր արձագանք և արդարացի վրդովմունք է առաջացրել, ինչը բացասաբար է անդրադառնում երկու հարևան պետությունների և ժողովուրդների միջև բարիդրացիական հարաբերությունների և համագործակցության ամրապնդման գործընթացի վրա։
Տաճարում և դրա շրջակա տարածքում իրականացվող ցանկացած միջամտություն հատկապես մտահոգիչ է Վրաց Ուղղափառ Եկեղեցու համար։ Բազմաթիվ հարցեր են առաջանում ինչպես աշխատանքների անորոշ նպատակների, այնպես էլ վրացական մշակութային ժառանգության հուշարձանի վերականգնման՝ վրացական կողմի հետ չհամաձայնեցնելու պատճառով»։
Հայտարարությունում ընդգծվել է, որ Վրաց Պատրիարքարանը այս գործողությունների մասին Ադրբեջանի համապատասխան պետական մարմիններից որևէ տեղեկատվություն չի ստացել։
«Այս փուլում կարևոր է որոշել, թե ինչպիսի աշխատանքներ են իրականացվում տաճարի տարածքում, ինչ ուսումնասիրություններ են հիմնված դրանց վրա և ովքեր են դրանք իրականացնում, ինչպես նաև ինչպես է ապահովվում վրացական մշակութային ժառանգության հուշարձանի պաշտպանությունը։
Հիմնվելով վերը նշվածի վրա՝ մենք կարծում ենք, որ անհապաղ անհրաժեշտ է ներգրավել վրաց պետության համապատասխան գերատեսչություններին գործընթացում և համապատասխանաբար արձագանքել՝ իրենց իրավասության և միջազգային համագործակցության առկա ձևաչափի շրջանակներում։ Կարևոր է, որ վերոնշյալ գերատեսչությունները հետաքրքրվեն խնդրով, ստանան պաշտոնական տեղեկատվություն և նպաստեն Վրաց պատրիարքարանի ներկայացուցիչների և ոլորտի վրացի մասնագետների ներգրավմանը դրա քննարկմանը»,- նշված է հայտարարության մեջ։
Պատրիարքարանից հույս են հայտնել նաև, որ ժամանակին և համակարգված համագործակցության միջոցով է հնարավոր կլինի պատշաճ պաշտպանել և պահպանել վրացական հոգևոր և մշակութային ժառանգության հուշարձանը։
Հետևեք մեզ տելեգրամում
