Ռուսաստանի արտաքին գործերի նախարարությունը կրկին զգուշացրել է օտարերկրյա քաղաքացիներին, այդ թվում՝ դիվանագիտական առաքելությունների աշխատակիցներին Ուկրաինայում գտնվելու և երկիր այցելելու վտանգների մասին՝ հայտարարելով, որ ռուսական զինված ուժերը շարունակելու են զանգվածային հարվածները։ «Region Monitor»-ի փոխանցմամբ՝ այս մասին հայտնել է ՌԴ ԱԳՆ-ն։
Հայտարարության համաձայն՝ Ռուսաստանը շարունակելու է հարվածներ հասցնել Կիևում և ուկրաինական այլ քաղաքներում գտնվող՝ իր բնորոշմամբ ռազմական նշանակության օբյեկտներին։ Մոսկվան այդ գործողությունները ներկայացրել է որպես պատասխան Ռուսաստանի խաղաղ բնակչության և քաղաքացիական ենթակառուցվածքների դեմ Ուկրաինայի զինված ուժերի գործողություններին, որոնք անվանել է «ահաբեկչական»։
ՌԴ ԱԳՆ-ն հիշեցրել է, որ ավելի վաղ Կիևում գտնվող օտարերկրյա քաղաքացիներին և դիվանագետներին կոչ էր արել լքել քաղաքը և հրաժարվել Ուկրաինա այցելություններից, իսկ երկրի բնակիչներին՝ չմոտենալ ռազմական ու վարչական ենթակառուցվածքների օբյեկտներին։ Բացի այդ՝ հայտարարության մեջ նշվել է, որ ԱՄՆ-ի, Մեծ Բրիտանիայի, ԵՄ անդամ պետությունների, Նորվեգիայի և Շվեյցարիայի իշխանությունները բազմիցս խորհուրդ են տվել իրենց երկրների քաղաքացիներին զերծ մնալ Ուկրաինա մեկնելուց։
Հետևեք մեզ տելեգրամում
