ՀՀ արտաքին գործերի և միջազգային առևտրի նախարար Արարատ Միրզոյանը հոկտեմբերի 5-ին Թեհրանում Իրանի արտաքին գործերի նախարար Սեյեդ Աբբաս Արաղչիի հետ քննարկել է երկու երկրների հարաբերությունների զարգացման հիմնական ուղղությունները։ Այս մասին հայտնում է ՀՀ արտաքին գործերի և միջազգային առևտրի նախարարությունը։
Ըստ հայկական կողմի հաղորդագրության՝ մինչ քննարկումների պաշտոնական հատվածին անցնելը նախարար Միրզոյանն իր ցավակցություններն է հայտնել Իրանի գործընկերոջը նրա քրոջ մահվան կապակցությամբ։
Զրուցակիցները քննարկել են Հայաստանի և Իրանի միջև հարաբերությունների զարգացման բոլոր հարցերը, մի շարք բնագավառներում համագործակցության ծրագրերը, այդ թվում՝ էներգետիկայի, տրանսպորտային և ենթակառուցվածքների զարգացման ոլորտներում: Անդրադարձ է կատարվել Հայաստան-Իրան սահմանին երկրորդ կամրջի կառուցման, էլեկտրահաղորդման 3-րդ գծի շինարարության շուտափույթ ավարտման կարևորությանը, ինչպես նաև երկու երկրների միջև առկա բեռնափոխադրումների դյուրացման հարցերին: Երկուստեք ընդգծվել է հարաբերությունների ռազմավարական բնույթը:
Հայաստանի և Իրանի նախարարները նաև մտքեր են փոխանակել ապաշրջափակման և տարածաշրջանային փոխկապակցվածության ծրագրերի շուրջ: Ընդգծվել է Իրանի աջակցությունը «Խաղաղության խաչմերուկ» ծրագրին: Միրզոյանը ներկայացրել է նաև «ԹՐԻՓՓ» նախագծի իրականացման ուղղությամբ տարվող աշխատանքները և դրա միջոցով տարածաշրջանի երկրների համար ստեղծվող նոր հնարավորությունները։
Կողմերն անդրադարձել են հանրային տեղեկատվության ոլորտում շարունակական համագործակցության կարևորությանը, այդ թվում՝ մեդիա դաշտում անհարկի շահարկումներին պատշաճ հակազդեցությանը։
Նախարարները քննարկել են նաև տարածաշրջանային զարգացումները։ Միրզոյանը նշել է, որ Հայաստանը ուշադրությամբ հետևում է ընթացիկ իրավիճակին և կարևորում առկա խնդիրների բանակցային ճանապարհով կարգավորմանն ուղղված ջանքերը։ Հանդիպմանը քննարկվել են նաև փոխադարձ հետաքրքրություն ներկայացնող այլ հարցեր։
Հետևեք մեզ տելեգրամում
