Սաուդյան Արաբիայի մայրաքաղաք Էր Ռիադի միջազգային օդանավակայանի վրա հոկտեմբերի 11-ին տեղի ունեցած հարձակման հետևանքով մեկ մարդ է զոհվել, ևս 11-ը՝ վիրավորվել։ Հարձակումը հաջորդել է հոկտեմբերի 10-ի հարվածին, որի հետևանքով զոհվել էր 13 մարդ, ավելի քան 300-ը՝ վիրավորվել։ Region Monitor-ի հաղորդմամբ՝ այս մասին հայտնում է «Reuters»-ը՝ հղում անելով Սաուդյան Արաբիայի իշխանություններին։
Սաուդյան Արաբիայի գլխավորած կոալիցիայի տվյալներով՝ հոկտեմբերի 11-ին անհայտ թռչող օբյեկտը հարվածել է օդանավակայանի 4-րդ տերմինալին, ինչի հետևանքով հրդեհ է բռնկվել։ Կոալիցիան հայտնել է նաև, որ օդանավակայանի մոտ որսացել է թևավոր հրթիռ։ Ավելի ուշ երկրի արևելքում խոցվել է անօդաչու թռչող սարք, իսկ Խամիս Մուշայիթ քաղաքի ուղղությամբ արձակված բալիստիկ հրթիռը վնասազերծվել է։
Եմենի հութիների ԶՈւ ներկայացուցիչ Յահյա Սարին հայտարարել է, որ իրենք են իրականացրել հոկտեմբերի 10-ի հարձակումը։ Նա նաև հայտնել է Սաուդյան Արաբիայի արևելքում գտնվող Դամամ քաղաքի օդանավակայանի և «Saudi Aramco» նավթային ընկերության երկու օբյեկտների վրա հարվածների մասին։ Սաուդյան Արաբիայի իշխանությունները հաստատել են Դամամի միջազգային օդանավակայանի վրա հարձակումը՝ նշելով, որ վնասների գնահատումն ու անվտանգության ստուգումները շարունակվում են։
Հութիները նաև սպառնացել են նոր հարվածներով, եթե Սաուդյան Արաբիան չդադարեցնի Եմենում ռազմական գործողություններն ու միջամտությունը։ Վերջին շրջանում թագավորությունն ուժեղացրել է հութիների դեմ գործողությունները՝ աջակցելով նրանց դեմ կռվող Եմենի կառավարական ուժերին։ ԱՄՆ նախագահ Դոնալդ Թրամփն էլ հայտարարել է, որ Վաշինգտոնը քննարկում է հութիների դեմ Սաուդյան Արաբիայի հարվածներին միանալու հնարավորությունը։
Հետևեք մեզ տելեգրամում
