Իրանի ԱԳՆ խոսնակ Էսմայիլ Բաղային քննադատել է բանակցությունների հարցում ԱՄՆ-ի մոտեցումը՝ հայտարարելով, որ Վաշինգտոնը ձգտում է ոչ թե բանակցել, այլ միակողմանիորեն թելադրել իր պահանջները։ Region Monitor-ի հաղորդմամբ՝ այս մասին Բաղային գրել է X-ի իր էջում:
«ԱՄՆ վարչակազմի կողմից դիվանագիտական պարտավորություններն անտեսելը և ուժի ու ճնշման կիրառման վրա հենվելն ի՞նչ կապ ունի իրանցիների կրոնական համոզմունքների հետ»,- նշել է Բաղային՝ անդրադառնալով ԱՄՆ պետքարտուղար Մարկո Ռուբիոյի այն հայտարարությանը, որ Իրանի հետ համաձայնության հասնելը դժվար է, քանի որ «երկրի ղեկավարությունը գտնվում է շիա արմատական հոգևորականների վերահսկողության ներքո, որոնք առաջնորդվում են աստվածաբանական համոզմունքներով»։
Բաղայիի խոսքով՝ հավատը չի բացառում բանականությունը, ինչպես որ աշխարհիկ լինելը պարտադիր չէ, որ ենթադրի ողջամտություն։ Նրա գնահատմամբ՝ բանակցություններն արդյունավետ վարելու հիմնական խոչընդոտը Իրանի կրոնական համոզմունքները չեն, այլ ամերիկյան բանակցային վարքագիծը, որն ավելի շատ նման է սեփական պահանջները միակողմանիորեն թելադրելուն, քան իրական դիվանագիտության։
«Չի կարելի մյուս կողմից զիջումներ ակնկալել՝ միաժամանակ պատրաստ չլինելով փոխադարձ զիջումների։ Չի կարելի սեփական պահանջները թելադրել, անտեսել մյուս կողմի օրինական շահերը և միաժամանակ ակնկալել կայուն համաձայնություն»,- հայտարարել է Իրանի ԱԳՆ խոսնակը։
Բաղայինը նաև կոչ է արել Իրանի կրոնական համոզմունքների վերաբերյալ գաղափարական կանխակալ դատողություններ անելու փոխարեն հասկանալ երկրի ռազմավարական շահերն ու անվտանգության հիմնավոր մտահոգությունները։ Նա ԱՄՆ-ին հորդորել է մեղադրանքներ հնչեցնելու փոխարեն «պատասխան տալ իր ստանձնած պարտավորությունները խախտելու և խոստումները չկատարելու համար»։
Հետևեք մեզ տելեգրամում
