Իսրայելի պաշտպանության բանակի գլխավոր շտաբի պետ Էյալ Զամիրը դեմ է արտահայտվել խորհրդարանական ընտրություններից առաջ Իրանի դեմ ռազմական գործողություն սկսելու վարչապետ Բենիամին Նեթանյահուի ծրագրին։ Այս մասին հայտնել է Իսրայելի 12-րդ հեռուստաալիքը։
Հեռուստաալիքի տվյալներով՝ Զամիրը պահանջել է, որ Նեթանյահուն նախ գրավոր ներկայացնի գործողության իրավական հիմնավորումը։ Գործողության բնույթի մասին պաշտոնական մանրամասներ չեն հաղորդվում։
Հեռուստաալիքի աղբյուրների փոխանցմամբ՝ ռազմական ղեկավարությունը մտահոգված է, որ քաղաքական գործիչները կարող են շահարկել Իրանի թեման։
Օրեր առաջ Զամիրը հայտարարել էր, որ այս պահին Քնեսեթի ընտրություններից առաջ Իրանի դեմ հարվածները վերսկսելու օպերատիվ անհրաժեշտություն չկա։ Միաժամանակ նա նշել էր, որ եթե ռազմական ղեկավարությունը նման հարվածն անհրաժեշտ համարի, այն կհասցվի։
Նեթանյահուի քննադատները նրան մեղադրում են Իրանի դեմ ռազմական գործողությունները վերսկսելու փորձի մեջ՝ հոկտեմբերի 27-ի ընտրությունների արդյունքների վրա ազդելու կամ քվեարկությունը հետաձգելու նպատակով։ Իսրայելի վարչապետը հերքում է այդ մեղադրանքները։
Նշենք, որ կիրակի ԱՄՆ նախագահ Դոնալդ Թրամփը լրագրողներին ասել էր, որ Միացյալ Նահանգները մոտ ժամանակներս Իրանի դեմ հարվածներ չեն հասցնի։
Հետևեք մեզ տելեգրամում
